Ձեր վստահելի աղբյուրը

Գործադիրի այսօրվա նիստում վարչապետ Կարեն Կարապետյանը հանձարարական տվեց անտառների կառավարման ու ապօրինի անտառահատումների վերաբերյալ:

Վարչապետի խոսքերով՝  վերջին ժամանակներս առավել հաճախ են բարձրաձայնվում անտառների կառավարման, ապօրինի անտառհատումների հետ կապված մտահոգությունները, խնդիրն առավել խորքային է և չի սահմանափակվում մի քանի ապօրինի անտառհատումների դեպքերով։

Ուստի, ըստ Կարեն Կարապետյանի, անհրաժեշտ է կատարելագործել անտառների կառավարման ներկա մոդելը ու համապատասխանեցնել կառավարման ժամանակակից պահանջներին։ 

«Կարևորում եմ  գիտական և տեխնիկական նորագույն միջոցների կառավարումն ու կառավարման մարմինների փոխկապակցված հետևողական աշխատանքը: Այս պահին կառավարման ներկա մակարդակը գնահատում եմ անբավարար»,- նշեց  Կարեն Կարապետյանը։

Վարչապետը ՀՀ գյուղատնտեսության նախարարին հանձնարարեց երկամսյա ժամկետում  ախտորոշել անտառների պահպանության  բնագավառում հիմնական խնդիրները, հստակեցնել անտառների կառավարման, վերականգնման և պահպանության ոլորտում  ներգրավված կազմակերպությունների ցանկը և դերը։ Նա նաև հանձնարարեց  կառավարության աշխատակազմ  ներկայացնել  ոլորտի կատարելագործման ուղղությամբ հստակ առաջարկություններ և գործողությունների ծրագիր, ինչպես նաև ներկայացնել ժամանակակից կառավարման մեթոդների, գործիքների և տեխնոլոգիաների ներգրավվման գործողությունների ծրագիր։

«Սերտ համագործակցելով  բնապահպանական պետական տեսչության ու իրավապահ մարմինների հետ՝ մշակել ու իրականացնել ապօրինի անտառահատումների դեմ պայքարի գործողությունների ծրագիր, որի արդյունքների վերաբերյալ պարբերաբար տեղեկատվություն ներկայացնել հասարակությանը», - ասաց վարչապետը։

«Բնապահպանության նախարարության բնապահպանական պետական տեսչության պետին էլ հանձնարարում եմ մեկշաբաթյա ժամկետում ուսումնասիրել վերջին երեք ամիսների ընթացքում մամուլում և սոցիալական ցանցերում բնապահպանական ՀԿ-ների և անհատ քաղաքացիների կողմից բարձրաձայնված անտառահատումների կապված խնդիրները, քննարկել, վերլուծել և ներկայացնել հաշվետվություն»,- ասաց վարչապետը: