Ձեր վստահելի աղբյուրը

Սահմանադրական դատարանում ապրիլի 2-ի ԱԺ ընտրությունների արդյունքները վիճարկելու վերաբերյալ Կոնգրես-ՀԺԿ դաշինքի դիմումի քննությանը դիմող կողմի ներկայացուցիչ, փաստաբան Տիգրան Եգորյանը պատասխանող կողմին՝ ԿԸՀ նախագահ  Տիգրան Մուկուչյանին հարցեր ուղղեց մանկապարտեզների և դպրոցների տնօրենների ձայնագրությունների մասին:

Նա հնչեցրեց հարց, որին Տ. Մուկուչյանն արձագանքեց. «Իմ պատասխանը՝ կետ, չակերտը բացած, ես այդ հարցին պատասխանել եմ, չակերտը փակ, վերջակետ»:

Տ. Եգորյանի հաջորդ հարցին նույն պատասխանը տրվեց:

ՀԱԿ փոխնախագահ Լևոն Զուրաբյանը տեղից ռեպլիկ արեց:

 «Պարոն Զուրաբյան, չի կարելի տեղից»,- ասաց ՍԴ նախագահ Գագիկ Հարությունյանը:

Տ. Եգորյանը շարունակեց իր հարցերը: Այդ ընթացքում Լ. Զուրաբյանը ժեստերով խոսում էր կողքի մարդկանց հետ:

Տիգրան Մուկուչյանն ասաց. «Առանց մատի»:

«Ես քո հետ խոսո՞ւմ էի, որ տեղից խոսեցիր»,- արձագանքեց Լ. Զուրաբյանը:

Տիգրան Մուկուչյանն էլ ասաց. «Քո չի, ձեր է»:

«Ես ստիպված եմ  ընդհատել նիստը և քննարկել ձեր վարքագիծը, տեղից չի կարելի: Չի կարելի»,- ասաց Գագիկ Հարությունյանը:

Փաստաբանը հետաքրքրվեց, թե արդյո՞ք ԿԸՀ-ն որևէ գործողություն ձեռնարկել է պարզելու՝ բացի այդ 114 դեպքից, այլ դպրոցներում էլ, մանկապարտեզներում էլ եղե՞լ են նմանատիպ դեպքեր, հնարավոր է լինեին:

Տ. Մուկուչյանը պատասխանեց. «Ոչ»:

Այնուհետև Տ. Եգորյանը հնչեցրեց մի քանի հարցեր ևս: ՍԴ անդամ Արևիկ Պետրոսյանը հանդես եկավ միջնորդությամբ՝ քննության առնել հարցուպատասխանի տևողությունը սահմանափակելու հետ կապված  հարցը:

Գագիկ Հարությունյանն ասաց, որ ՍԴ անդամի միջնորդությունը պետք է քննության առնվի անհապաղ, հավելեց, որ ընդմիջումից հետո (ժամը 15:00)  հարցի վերաբերյալ դատարանը կհայտնի իր դիրքորոշումը:

Այնուհետև ՍԴ անդամները հետաքրքրվեցին դիմող կողմից, թե իրենց որքա՞ն ժամանակ է հարկավոր հարցերն ավարտելու համար: Տ. Եգորյանն ասաց, որ մեկ ժամ:

«Քննարկենք միջնորդությունը՝ հաշվի առնելով ձեր նկատառումը»,- ասաց ՍԴ նախագահը: