Ձեր վստահելի աղբյուրը

Սահմանադրական դատարանում ապրիլի 2-ի ԱԺ ընտրությունների արդյունքները վիճարկելու վերաբերյալ Կոնգրես-ՀԺԿ դաշինքի դիմումի քննությանն իր եզրափակիչ ելույթում ԿԸՀ քարտուղար Արմեն Սմբատյանը հայտարարեց, որ տեղամասային ընտրական հանձնաժողովներից ստացած տվյալները քվեարկության վերաբերյալ հավաստի են:

«Դրանք հատ առ հատ մուտքագրվել են: Ընդհանուր առմամբ, հաշվարկվել է 250 հազար տվյալ, որոնց ճշտության վերաբերյալ անգամ դիմող կողմը կասկած չհարուցեց այստեղ: Ընդունեց, որ դրանք համապատասխանում են հանձնաժողովների կողմից կազմված արձանագրություններին»,-ասաց նա:

ԿԸՀ քարտուղարը նշեց, որ ընտրական համակարգի նկատմամբ վստահության բարձրացման կարևորագույն գիտակցումը պետք է ունենան ինչպես իշխանություն հանդիսացող, այնպես էլ ընդդիմադիր քաղաքական ուժերը:

«Առանց քաղաքական դերակատարների կողմից ընտրական համակարգի նկատմամբ ադեկվատ վերաբերմունքի չենք ունենա ավելի լավ ժողովրդավարություն, առանց գիտակցման, որ  ընտրական համակարգը բոլորի կողմից ունի հոգածության կարիք, չենք ունենա վստահության ավելի մեծ պաշար: Միայն պետության, պետական մարմինների, պաշտոնատար անձանց կողմից ներդրված ջանքերը բավարար չեն: Պետք է տարբերակել ընտրական կեղծիք հասկացությունը ընտրական գործընթացում տեղ գտած թերություններ  հասկացությունից»,- ասաց Ա.Սմբատյանը:

Նրա խոսքով, ընտրական գործընթացներում փոփոխություններն ու առաջընթացը չտեսնելու կամ այդ մասին լռելու պրակտիկան վնասում է  բոլոր քաղաքական ուժերին,  ժողովրդավարության արժեքներին,  հասարակական ճշմարտությանը, պետությանն ու պետության ապագային:

Եզրափակիչ ելույթով հանդես եկավ նաև դիմող կողմի փաստաբան Վահե Գրիգորյանը:

«Միակուսակցական ամբողջատիրության դիակը վաղուց բախում է այս դատարանի դռները, կամ դուք նրան ցույց եք տալու իր տեղը, կամ դուք սպասելու եք, որ նա վերակենդանացած ձեզ ցույց տա այդ տեղը:

Եթե նույնիսկ այս դատարանը չի կարողանա բավարարել դիմումն ամբողջությամբ, առնվազն պարտավոր է համարժեքորեն արձագանքել Հայաստանի Հանրապետությունում այս պահին տիրող սահմանադրական ճգնաժամին»,- իր ելույթում ասաց նա:

Վ. Գրիգորյանի ելույթն ամբողջությամբ՝ տեսանյութում: