Ձեր վստահելի աղբյուրը

ՀՀ Վճռաբեկ դատարանը վարույթ չի ընդունել Վալերի Պերմյակովի գործով տուժողների իրավահաջորդների բողոքը՝  ոչ նյութական վնասի հատուցման պահանջով: Ավետիսյանների իրավահաջորդները ՌԴ-ից պահանջում էին 450 հազար եվրոյի բարոյական փոխհատուցում: 

«Մենք քաղհայց էինք ներկայացրել ընդդեմ Ռուսաստանի Դաշնության: Հայաստանի առաջին ատյանի և Վերաքննիչ դատարանները հրաժարվել էինք այդ հայցը քննարկել: Մենք Վճռաբեկ բողոք էինք ներկայացրել: Ըստ էության, Վճռաբեկ դատարանն էլ վարույթ չընդունելով՝ փաստել է, որ Հայաստանում տուժող կողմը հնարավորություն չունի կյանքի իրավունքի խախտման հիմքով նյութական վնասի փոխհատուցում պահանջել»,- Panorama.am-ի հետ զրույցում ասաց Ավետիսյանների իրավահաջորդի ներկայացուցիչ, փաստաբան Լուսինե Սահակյանը:

Նա նշեց, որ  բարձրացնելու են սահմանադրականության հարց, նաև քննարկվում է ՌԴ-ում հայց ներկայացնելու, Եվրոպական դատարան դիմելու հարցերը:

Հիշեցնենք, որ 2015 թվականի հունվարի 12-ին Պերմյակովը մտել էր Գյումրի քաղաքի Մյասնիկյան փողոցի տներից մեկը և դաժանաբար սպանել Ավետիսյանների 7 հոգանոց ընտանիքին: 2016թ. օգոստոսի 23-ի դատավճով Պերմյակովը մեղավոր էր ճանաչվել ՀՀ քրեական օրենսգրքի մի շարք հոդվածներով՝ 104-րդ հոդվածի 2-րդ մասի 1-ին, 5-րդ և 8-րդ կետերով՝ առանձին դաժանությամբ, ավազակությամբ զուգորդված երկու կամ ավելի անձանց սպանություն, 175-րդ հոդվածի 2-րդ մասի 3-րդ և 4-րդ կետերով՝ բնակարան ապօրինի մուտք գործելով, զենքի գործադրմամբ ավազակություն և 34-329-րդ հոդվածի 1-ին մասով՝ պետական սահմանն ապօրինի հատելու փորձ,  ու դատապարտվել ցմահ ազատազրկման: