Ձեր վստահելի աղբյուրը

Եվրոպական միությունը հանրակցության 27 երկրների ձևաչափով հերթական գագաթնաժողովը կանցկացնի հունիսին: «ՏԱՍՍ»-ի փոխանցմամբ՝ այս մասին Բրյուսելում լրագրողներին է հայտնել ԵՄ-ի խորհրդի դիվանագիտական աղբյուրը:

Աղբյուրը նշել է, որ հանդիպումը, ամենայն հավանականությամբ, կկայանա ԵՄ-ի 28 երկրների պլանային հունիսյան գագաթնաժողովի շրջանակներում:

Նա նաև հայտնել է, որ Եվրամիության 27 երկրների ղեկավարները մտադիր են մինչև մայիսի 22-ն ավարտել Brexit-ի շուրջ Մեծ Բրիտանիայի հետ բանակցություններին նախապատրաստվելու գործընթացը:

«Մենք ցանկանում ենք մինչև մայիսի 22-ն ավարտել գործընթացը՝ բոլոր մանրամասներով»,-ասել է նա:

Ապրիլի 29-ին Բրյուսելում կայանալիք գագաթնաժողովը պետք Է հաստատի ԵՄ-ի բանակցային դիրքորոշման հիմնական դրույթները: Լիսաբոնի պայմանագրի համաձայն, հանրակցության կազմից երկրի դուրս գալու շուրջ բանակցություններին երկու տարի է հատկացվում՝ սկսած դուրս գալու մասին պաշտոնական ծանուցում տալու պահից: Այդ ծանուցումը Միացյալ Թագավորության վարչապետ Թերեզա Մեյը Եվրոպական խորհրդին հանձնել է մարտի 29-ին։