Ձեր վստահելի աղբյուրը

«Սահմանադրական դատարանում մեր դիմումի քննարկումը շատ կարևոր արդյունքներ է տվել»,-ՍԴ-ում ապրիլի 2-ի ԱԺ ընտրությունների արդյունքները վիճարկելու վերաբերյալ Կոնգրես-ՀԺԿ դաշինքի դիմումի քննության եզրափակիչ ելույթում ասաց դաշինքի անդամ, ՀԱԿ փոխնախագահ Լևոն Զուրաբյանը:

Նրա խոսքով, դատական քննության ընթացքում ապացուցվել է  ՀՀԿ-ի կողմից պետական իշխանության լծակների և վարչական ռեսուրսի ապօրինի օգտագործումը, որը կրել է համակարգային, կազմակերպված բնույթ, էապես ազդել է ընտրությունների արդյունքների վրա։

«Ապացուցվեց նաև, որ ԿԸՀ-ն և իրավապահ համակարգը պարտակել են այդ հանցագործությունը: Ապացուցված է ընտրակաշառքի բաժանման նկատմամբ ԿԸՀ-ի և իրավապահ համակարգի վերևից հրահանգավորված հանդուրժողականությունը, իրավապահ  համակարգի հանցավոր անգործությունը, պարտակումը: Ապացուցված են քվեարկության գաղտնիության բազմաթիվ խախտումներ, ապացուցված է, որ ոչ ԿԸՀ-ն, ոչ Սահմանադրական դատարանը  չուզեցին այդ ապացույցները քննել: Վստահ եմ, որ ՍԴ չի բավարարի մեր հայցը: Խնդիրը  սակայն չի լինելու ապացույցների անբավարարության մեջ: Ձեզ չի էլ հետաքրքրում ճշմարտության փնտրտուքը, քանի որ դուք այն գիտեք»,-հայտարարեց Զուրաբյանը։

Նաև ասաց, որ Հայաստանում այսօր ժողովուրդը  ահաբեկչված, վախեցած հեռանկարներին չվստահող է, որովհետև ժողովուրդն ընտրություններին չի վստահում:

«Այս փակուղուց պետք է ելքեր փնտրել, իսկ ելքը շատ պարզ է՝ ամեն ինչ անել ճշմարտության հաղթանակի համար: Չեմ կարծում, որ այսօր ճշմարտությունը կհաղթանակի, բայց մի օր դա ազգովի անելու ենք»,- ասաց նա:

Զուրաբյանի այս  խոսքերից հետո դահլիճում ծափեր հնչեցին, ինչին ՍԴ նախագահ Գագիկ Հարությունյանն արձագանքեց. «Թատերական ներկայացման չեք մասնակցում»:

Լևոն Զուրաբյանն էլ ավելացրեց. «Այս ֆարսին մասնակցելու որևէ ցանկություն չունեմ»: