Ձեր վստահելի աղբյուրը

Երևանի ավագանու ընտրությունների մասնակից «Երկիր Ծիրանի» կուսակցության ընտրական ցուցակը գլխավորող  Զարուհի Փոստանջյանն այսօր քարոզարշավի շրջանակում «Հաղթանակ» զբոսայգում էր: Նա զրուցեց զբոսայգու տարածքում մանրածախ առևտրով զբաղվող  կանանց հետ, ովքեր դժգոհեցին, որ առևուր չկա, արդեն հոգնել են:

«Ոչինչ, պետք է դիմանանք ու դիմադրենք: Պարտավոր ենք լավացնել վիճակը, որովհետև եթե չէ, ապա բոլորս միասին ենք կործանվում: Անկումը բոլորիս համար է լինելու, եթե չենք փոխվում»,- ասաց Զ.Փոստանջյանը:

Նա նշեց, որ խոշորներն ուզում են այս մանրածախ առևտուրն էլ իրենք իրականացնեն:

Զ. Փոստանջյանն իր կուսակցիների հետ մոտեցավ զբոսայգում գտնվող մարդկանց, ողջունեց նրանց, զրուցեց նրանց հետ:

«Քաղաքացիների կողմից ջերմ ընդունելություն է արձանագրվում: Կա մեծ աջակցություն, կարող ենք ասել ողջ հայության աջակցությունն է և համակրանքը դեպի մեզ: Մեր ծրագիրը համահայկական է, սահամանափակ չէ, ներառում է իր մեջ մեր ժողովրդի համախմբումը: Գտնում ենք, որ կարող ենք սկսել Երևանից և համախմբումը, և օրինական կարգերի հաստատումը»,- ասաց Զ. Փոստանջյանը:

Նա նշեց նաև, որ Երևանի բնակիչները հիմնականում դժգոհ են աշխատանք չունենալուց, իսկ աշխատատեղերի բացակայությունը, Երևանի քաղաքապետի թեկնածուի խոսքով, պայմանավորված է նաև քաղաքային իշխանությունների ապաշնորհ քաղաքականությամբ:

Նա ասաց, որ քաղաքը կանաչ տարածքների հաշվին կառուցապատվել է, անտառածածկ տարածքներն այսօր, ըստ էության, վերացել են. «Երևանն անապատացման ճանապարհին է գտնվում,  վայրագ կառուցապատումը հանգեցնելու է նրան, որ Երևանը պիտանի չի լինելու ապրելու համար»: