Ձեր վստահելի աղբյուրը

Ֆրանսիայի նախագահի թեկնածու, «Առաջ» շարժման առաջնորդ Էմմանուել Մակրոնը չի բացառել Եվրամիության կազմից երկրի դուրս գալը: Լենտա.ռու-ի հաղորդմամբ, ընտրությունների երկրորդ փուլից մեկ շաբաթ առաջ նա հայտարարել է այս մասին BBC News-ին տված հարցազրույցում:

Մակրոնը հայտարարել է, որ միշտ եղել է և մնում է եվրոպամետ քաղաքական գործիչ:

«Նախընտրական քարոզարշավի ընթացքում և մշտապես  պաշտպանել եմ եվրոպական գաղափարներն ու եվրոպական քաղաքականությունը,  այդ իսկ պատճառով ես կարծում եմ, որ դա շատ կարևոր է ֆրանսիացի ազգի համար»,- ասել է նա:

Բայց,  նախագահի թեկնածուի կարծիքով, երկրի բնակչության կեսը «զայրանում է եվրոպական այդ գաղափարների վրա»: Այդ պատճառով Մակրոնը վստահ է, որ Եվրամիությունը բարեփոխումների կարիք ունի:

«Եթե ընտրությունների հաջորդ օրը ես որոշեմ միջոցներ ձեռնարկել և շարունակել ԵՄ ընթացիկ գործունեությունը, ապա ես կդավաճանեմ իմ ժողովրդին, ես չեմ ուզում այդպես անել, քանի որ հաջորդ օրը մենք կստանանք Frexit կամ կրկին՝ «Ազգային ճակատ»»,- հայտարարել է Մակրոնը:

Հիշեցնենք, որ Ֆրանսիայում նախագահի ընտրությունների 2-րդ փուլ են անցել Էմմանուել Մակրոնը  և «Ազգային  ճակատ» կուսակցության նախագահ Մարին Լե Պենը: Ընտրությունների երկրորդ փուլը տեղի կունենա մայիսի 7-ին: Մարին Լե Պենը  բազմիցս հայտարարել է, որ Ֆրանսիան բավականին շատ արտոնություններ է տվել Բրյուսելին: Նա ասել է, որ նախագահ ընտրվելու դեպքում հայտարարելու է  Frexit-ի մասին հանրաքվե:

Frexit-ն անգլերենով արտահայտություն է՝ France (Ֆրանսիա) և exit (ելք),  ինչպես Brexit-ը՝ (Մեծ Բրիտանիայի ելքը ԵՄ-ից):