Ձեր վստահելի աղբյուրը

«Ուռա, կեցցե մայիսի մեկը, աշխատավորության օրը, կեցցե Կոմունիստական կուսակցությունը, կեցցե հայ գյուղացին, բանվորը»: Նման կոչերով, թմբուկներով ու շեփորներով տոնական երթի են դուրս եկել Կոմունիստական կուսակցության անդամները:

Երթի մասնակիցները կարոտով են հիշում խորհրդային տարիները, դժգոհություն հայտնում այսօր իրենց տրվող կենսաթոշակի չափից: Ասում են՝ աշխատել են լավ, հիմա կոպեկներ են տալիս:  Նրանք հիշեցին՝ ուսումը ձրի էր, մանկապարտեզը ձրի էր, հիմա ամեն ինչ փողով է:

«Առանց ռուսների մենք զրո ենք: Ո՞րն է անկախությունը, ոչ մի բանը մերը չի, հայ ժողովուրդը Հայաստանի տերը չի: Անգամ ջուրը մերը չի, ֆրանսիացին եկել հաշվիչը դրել, մեզ վրա է ծախում: Մարդիկ դարձել են վտարանդի: Մենք քաղցր վերհուշ ենք ապրում»,-ասաց կոմկուսի անդամներից մի տղամարդ:

Նրանք հիշում էին, որ խորհդային տարիներին Քոչինյանի, Դեմիրճյանի ու այլոց հետևից ոչ մի թիկնապահ չէր գնում, քանի որ ժողովուրդը սիրում էր:

«Արդյունաբերություն կար, տնտեսություն կար»,-ասաց «Սովետական Հայաստան» թերթի նախկին թղթակիցը:

Կուսակցության առաջնորդ Տաճատ Սարգսյանը նշեց, Կոմկուսը միակ ուժն է, որ նշում է այս տոնը, հավատարիմ են մնացել իրենց գաղափարախոսությանը, արժեքներին:

«Եկել են մասնակցելու հանրապետության բոլոր մարզերից, մոտ հինգ հազար մարդ է մասնակցում երթին: Տեսեք՝ մարդիկ ինչքան ժպիտով են մեզ նայում, որովհետև հիշում են խորհրդային տարիները»,-ասաց Սարգսյանը:

Նա համոզված է, իրենց համակիրները շատ են ու ամենևին էլ չի հավատում, որ խորհրդարանական ընտրություններում իրենց այդքան քիչ մարդ է ընտրել:

«Մեզ համար զարմանք ու զայրանք էր»,-ասաց Սարգսյանը, ավելացնելով, որ առանց ընկճվելու, սկսել են պատրաստվել հաջորդ համապետական ընտրություններին: