Ձեր վստահելի աղբյուրը

«Եկեք,  միասին ազատագրենք մեր քաղաքն անարդարություններից»: Այս կոչն Էրեբունի վարչական շրջանի բնակիչներին ուղղեցին Երևանի ավագանու մասնակից «Երկիր ծիրանի» կուսակցության առաջնորդ Զարուհի Փոստանջյանն ու ավագանու այլ թեկնածուներ:

Մի քանի քաղաքացիների Փոստանջյանին ասացին՝ իրեն համակրում են:
«Համակրելը քիչ է»,-արձագանքեց Փոստանջյանն ու կոչ արեց ակտիվորեն մասնակցել ընտրություններին, օգնել, որ կարողանա իրականություն դարձնել նախընտրական ծրագրի դրույթները:

Փոստանջյանը մտավ խանութներ, բաժանեց քարոզչական նյութերը, հարցրեց աշխատակիցների որպիսությունը:

Կուսակցության անդամները մտան նաև «Երևան սիթի» սուպերմարկետ, սկսեցին բուկլետներ բաժանել հաճախորդներին: Սուպերմարկետի մասնաճյուղի տնօրենը հարցրեց, ինչով կարող է օգնել, պատրաստակամություն հայտնեց նրա հետ զբոսնել սուպերմարկետում: Փոստանջյանը հրաժարվեց, շնորհակալություն հայտնեց ու դուրս եկավ:

Քարոզարշավի հաջորդ կանգառը սուպերմարկետի հարևանությամբ գործող տոնավաճառն էր: Այստեղ առևտրականները դժգոհեցին՝ գործ չկա:

Փողոցում հանդիպող քաղաքացիները լուսանկարվում էին կին գործչի հետ, հաջողություն մաղթում ընտրություններում:

«Սիրելի երևանցի, բարձրացրու գլուխդ, ուղղիր մեջքդ, քվեարկիր քաղաքական գործիչ, միակ ընդդիմադիր Զարուհի Փոստանջյանին, ով չի հարմարվել իշխանության խամաճիկներին, քաղաքական գործիչ, ում խոսքը համահունչ է գործին, որի թիմում չկան քրեաօլիգարխիկ տարրեր»,-բարձրախոսով կոչ էին անում կուսակցության անդամները: