Ձեր վստահելի աղբյուրը

«Շնորհավոր բոլորի մայիսի 1-ը: Մենք առաջարկում ենք մայիսի 14-ը ևս դարձնել տոնակատարություն, դրա համար անհարժեշտ է, որ ընտրություններում հաղթի «Ելք» դաշինքը»,-  Երևանի Կենտրոնում նախընտրական քարոզարշավի շրջանակում  հայտարարում էին ավագանու ընտրություններին մասնակցող «Ելք» դաշինքի անդամները:

Դաշինքի կողմից քաղաքապետի թեկնածու առաջադրված Նիկոլ Փաշինյանն ասաց. «Մայիսի 14-ին կայանալիք ավագանու ընտրություններում ունեք հնարավորություն մայրաքաղաքում հաստատված կոռումպացված իշխանությունը փոխարինելու արդյունավետ և հաշվետու իշխանությամբ»:

Լրագրողների հետ զրույցում քաղաքապետի թեկնածուն բացառեց, որ իրենց  հաղթանակից հետո Երևանում որևէ պատմամշակութային հուշարձան որևէ ոտնձգության  կենթարկվի: Ինչ վերաբերում է  կանաչ տարածքներին, նա նշեց, որ ցանկացած տեղ, որտեղ հնարավոր է կանաչապատում, պետք է իրականացվի, Երևանը պետք է օղակվի  կանաչ գոտիով:

«Ոչ խելամիտ կառուցապատման հետևանքով այսօր Երևանի կենտրոնում ավտոկայանատեղերի, խցանումների խնդիր կա: Երևանի կենտրոնում կառուցապատումն ընդհանրապես պետք է սահմանափակել, պետք է բանաձևեր գործեն՝ արդյո՞ք այդ կառուցապատումը, որ տեղի է  ունենում,  մեծացնելու է պրոբլեմը, թե լուծելու է»,- ասաց Ն. Փաշինյանը:

Խոսելով  աշխատատեղերի բացակայության մասին, նա նշեց, որ այդ խնդիրը չի լուծվի այնքան ժամանակ, մինչև Հայաստանում ի վերջո արտադրական, արդյունաբերական տնտեսություն չլինի:

«Մենք այս ընտրությունները կարևորում ենք ոչ միայն զուտ Երևանի քաղաքապետի և քաղաքապետարանի իմաստով, այլև կարևորում ենք նրանով, որ մեր ընտրությամբ  ՀՀԿ-ի միահեծան իշխանությանը շատ լուրջ հակակշիռ կստեղծվի ոչ միայն Երևանի, այլ ընդհանրապես  Հանրապետության մասշտաբով»,- ասաց Նիկոլ Փաշինյանը: