Ներդրումների ներգրավման եվրոպական փորձը փոխանցվել է հայաստանյան իրավասուներին
Երևանում այսօր կայացել է «Հայաստանում ներդրումների խթանման և ներդրումային քաղաքականության ինստիտուցիոնալ կարողությունների հզորացում» Թվինինգ ծրագրի՝ օտարերկրյա ուղղակի ներդրումներին նվիրված համաժողովը և ծրագրի պաշտոնական փակման արարողությունը:
Ծրագրի եվրոպական գործընկերն էր օտարերկրյա ներդրումների և արտահանման զարգացման ֆրանսիական պետական գործակալությունը՝ «Բիզնես Ֆրանսը»: Հայկական կողմից ներգրավված են եղել ՀՀ տնտեսական զարգացման և ներդրումների նախարարությունն ու Հայաստանի զարգացման հիմնադրամը։
ՀՀ տնտեսական զարգացման և ներդրումների նախարարի առաջին տեղակալ, ծրագրի հայաստանյան ղեկավար Գարեգին Մելքոնյանը նշեց, որ ծրագիրը մեկնարկել էր 2015 թվականի հոկտեմբերին: Այն ունեցել է երեք բաղադրիչ. առաջին բաղադրիչը հետներդրումային ծառայությունների զարգացումն էր, երկրորդը՝ օտարերկրյա ուղղակի ներդրումների ռազմավարության զարգացումն ու ներդրումային միջավայրի բարելավումը, երրորդը՝ ներդրումների խթանումն է և ներդրումային քաղաքականության իրականացման աջակցությունն ու առաջմղումը:
Նրա խոսքերով՝ ծրագիրն իրականացվել է Հայաստանում արտաքին ներդրումների խթանման քաղաքականությունը զարգացնելու և օտարերկրյա ուղղակի ներդրումների ավելացման միջոցով տնտեսական աճի, աշխատատեղերի ստեղծման՝ ի դեմս ՀՀ տնտեսական զարգացման և ներդրումների նախարարության ու Հայաստանի Զարգացման Հիմնադրամի, քայլերին աջակցելու նպատակով: Ծրագրի բյուջեն կազմել է 810 000 եվրո, որն ամբողջությամբ ֆինանսավորվել է Եվրամիության կողմից։
Եվրոպական Միության պատվիրակության ներկայացուցիչ, համագործակցության բաժնի ղեկավար Հոա-Բին Աջեմյանը նշեց. «Ես ուզում եմ վերահաստատել ԵՄ պատրաստակամությունը՝ օժանդակելու Հայաստանին բարեփոխումների գործընթացում, ինչպես նաև աջակցելու ՀՀ քաղաքացիներին՝ ապրել մի այնպիսի միջավայրում, որտեղ կան հեռանկարներ»:
Նրա խոսքերով՝ ԵՄ-ն Հայաստանին օժանդակություն է տրամադրում տարբեր ոլորտներում, բացի այդ, աջակցում է ՀՀ կառավարությանը՝ ավելի լավ կառավարում իրականացնելու համար:
Նա նաև նշեց, որ իրականացնում են տարբեր ծրագրեր` ՓՄՁ-ների զարգացում, ֆինանսների հասանելիություն, էլեկտրոնային կառավարման ծրագրեր` ապահովելու բիզնեսներին ավելի բարձր հասանելիությունև այլն: «Կարևոր է խթանել բոլոր այս ծրագրերը և այն ամենն ինչ Հայաստանն ունի: Այս ծրագրի նպատակը հենց դա է, որովհետև ներդրողները պետք է տեղյակ լինեն բոլոր այն հնարավորություններից, որոնք կան Հայաստանում և Հայաստանը օգտագործելով որպես մի հարթակ` Եվրասիական միության, Իրանի, ամերիկյան ընկերությունների համար՝ կարողանան ապահովել մուտք Եվրոպական շուկա: Այսինքն այս ծրագիրը այն բանալին էր, որը կապահովի բոլոր այս հարցերի լուծումը, որպեսզի ներդրողները գան Հայաստան»,- նշեց Հոա-Բին Աջեմյանը:
Հայաստանում Ֆրանսիայի դեսպան Ժան Ֆրանսուա-Շարպանտիեն էլ ասաց, որ նորանոր ներդրումներ խրախուսելը Հայաստանի կառավարության որդեգրած գերակայությունից է: Ըստ նրա՝ «Բիզնես Ֆրանսը» Ֆրանսիայում իրականացնում է նույն առաքելությունը, ինչն այսօր Զարգացման հայկական հիմնադրամը` Հայաստանում:
Նշենք, որ համաժողովին օտարերկրյա ներդրող ընկերությունների, Եվրամիության Հայաստանի գրասենյակի, այլ միջազգային կառույցների ու մեր երկրի տնտեսական ոլորտի պատասխանատուները քննարկել են ներդրումային միջավայրը, հնարավորությունները, կառավարության աջակցության ծրագրերը:
Թվինինգ ծրագրի շրջանակում 16 ամսվա ընթացքում հայ մասնագետներին ներկայացվել է եվրոպական լավագույն փորձը. նախարարության և հիմնադրամի մասնագետներին եվրոպական 20 փորձագետներ փոխանցել են ներդրումների ներգրավման՝ «Բիզնես Ֆրանսի» կողմից ընդունելի արդյունավետ գործիքակազմը։ Շեշտը դրվել է դեպի Հայաստան ներդրումների խթանման, օտարերկրյա ընկերությունների մասնաճյուղ հիմնելու, նոր աշխատատեղերի ստեղծման ու տնտեսական զարգացման վրա։ Այս մոդելը կիրառում են աշխարհի առաջադեմ երկրների ներդրումների խթանման գործակալությունները։ Մասնավորապես՝ աշխատանքներ են տարվել ոլորտային ներդրումային ռազմավարության մշակման ուղղությամբ. այդ թվում՝ թիրախավորվել են ներդրումային ոլորտները, իրականացվել է համեմատական վերլուծություն այլ համադրելի երկրների հետ, SWOT վերլուծություն և այլն, նախապատրաստվել են Հայաստանի վերաբերյալ տեղեկատվական նյութեր, ստեղծվել է պոտենցիալ ներդրողների տվյալների շտեմարան, «Բիզնես Ֆրանսի» աջակցությամբ՝ ՀԶՀ-ի կողմից Ֆրանսիայում անցկացված Հայաստանի ներդրումային միջավայրի քարոզարշավի արդյունքում Հայաստանի զարգացման հիմնադրամը սերտ կապեր է հաստատել 136 ընկերության հետ, ի հայտ է եկել 9 նոր հնարավորություն և 11 ներդրումային նախագիծ:
Լրահոս
Տեսանյութեր
Պիպոյանը՝ Պապոյանին. Մեզ համար պարենային անվտանգությո՞ւնն ու ազգային անվտանգությո՞ւնն են կարևոր, թե՞ ինքնարժեքը