Ձեր վստահելի աղբյուրը

Դրեզդենի սիմֆոնիկ նվագախումբը ծրագրել է համերգ տալ ԱՄՆ-ի և Մեքսիկայի հենց սահմանին՝ իր անհամաձայնությունը հայտնելով ԱՄՆ նախագահ Դոնալդ Թրամփի՝ երկու երկրի միջև պատ կառուցելու պլանին: ՏԱՍՍ-ի հաղորդմամբ, այս մասին հայտնել է DPA գործակալոթյունը:

Համերգը նախատեսված է հունիսի 3-ին Բարեկամության զբոսայգում, որի մի մասը գտնվում է ամերիկյան Սան Դիեգոյի տարածքում, մյուս մասը՝ մեքսիկական Տիխուանա քաղաքի տարածքում:

«Մենք ուզում ենք հղել ազատության կոչ և մեր անհամաձայնությունը հենց մարդկանց գլխի վերևում պատ կառուցելու ծրագրին»,- ասել է գերմանական նվագախմբի գեղարվեստական ղեկավարը:

Նա նշել է, որ նվագախումբը համերգի համար համացանցով հավաքել է 13 հազար եվրո, նվիրատվության մեծ մասը հենց ԱՄՆ քաղաքացիների կողմից է:

Հատուկ այդ համերգի համար գերմանացի կոմպոզիտոր Վիլանդ Ռայսմանը գրել է ստեղծագործություն՝ «Հարց պատասխանով»: Այն ենթադրում է անսովոր կատարում. գերմանական նվագախումբն իր մասը կատարելու է Մեքսիկայի տարածքում, իսկ հետո սպասելու է ամերիկյան կողմից պատասխանի:

Կազմակերպիչները հույս ունեն, որ համերգին կմիանան նաև ԱՄՆ-ից կոլեկտիվներ՝ տեղի սիրողական նվագախմբերն ու խմբերը, նաև մենակատարներ:

«Դա կլինի հզոր համերգ»,- ասել է նվագախմբի գեղարվեստական ղեկավարը:

Թրամփը հունվարի 25-ին հրամանագիր է ստորագրել Մեքսիկայի հետ ավելի քան 3 հազար կմ երկարությամբ պատ կառուցելու մասին և հայտարարել, որ պատի կառուցման աշխատանքները կսկսվեն անմիջապես: Ամերիկացի առաջնորդը հայտարարել է նաև, որ շինարարության համար վճարելու է Մեքսիկան: Այդ երկրի նախագահն էլ  ասել է, որ Մեքսիկան չի վճարելու: