Ձեր վստահելի աղբյուրը

Այսօր՝ «Էրեբունի» բժշկական կենտրոնում հնգյակ է ծնվել՝ 4 աղջիկ և 1 տղա: Մասնագետների գնահատմամբ՝  սա բացառիկ դեպք է, քանի որ երեխաները ծնվել են բնական ճանապարհով։

Հնգյակի մայրը՝  23-ամյա Լուսինե Պողոսյանն իրեն լավ է զգում: Լրագրողների հետ զրույցում ասաց, որ սա իր առաջին հղիությունն էր:

«Սկզբում իմացել ենք եռյակ է լինելու, հետո որ իմացանք հնգյակ է, շոկի մեջ էի: Վերջերս եմ դուրս եկել շոկից», - ասաց Լուսինեն:

Ծնողներն արդեն որոշել են երեխաների անունները՝ Արա, Աննա, Լիլիթ, Թեհմինե, Ռոզի:

Լուսինեն  նշեց, որ մայրը, սկեսուրը և իր քույրերը կօգնեն խնամել երեխաներին:

Հնգյակի ծնողներն ասացին, որ ապրում ապրում են Մեծամորի հանրակացարանում՝ վարձակալած բնակարանում:

Երեխաների հայրը՝  Վարդան Կարապետյանը նշեց, որ հույս ունեն՝ պետությունն իրենց բնակարան կնվիրի:

Վ.Կարապետյանը հայտնեց, որ աշխատում է վարկային կազմակերպությունում՝ որպես գանձապահ:

Վարդանի մայրը՝ Ռոզա Մարուքյանն ասաց, որ ամուսնու գեներում զույգ երեխա ունեցողներ կան:

«Վարդանի հորաքույը երկու անգամ զույգ երեխա է ունեցել, բայց նման հրաշքն անսպասելի էր»,- նշեց հնգյակի տատիկը:

Նրա խոսքերով՝ Ռուսաստանում է եղել, երբ տղան զանգել է աչքալուսանք տվել, որ տատիկի է դառնալու, իսկ որոշ ժամանակ անց հայտնել, որ եռյակ են ունենալու։

«Ես վերադարձա Հայաստան, հարսիս տարանք հիվանդանոց ու պարզվեց, որ ոչ թե երեքն են, այլ՝ հինգը: Իմ առաջին թոռնիկներն են»,- ժպտալով ասաց տիկին Ռոզան՝ հավելելով, որ իրենց սերն ու ջերմությունը բոլոր թոռիկներին էլ կհերիքի: