Ձեր վստահելի աղբյուրը

Ունենք «Ծառուկյան» դաշինք, «Ելք» դաշինք,  հիմա էլ, ի դեմս «Ծառուկյան» դաշինքից նեղացածների, ունենք նաև Բրուտոսի անվան դաշինք: Լրագրողների հետ այսօր կայացած հանդիպման ժամանակ ասաց Գերագույն խորհրդի նախկին պատգամավոր Ազատ Արշակյանը:

««Ծառուկյան» դաշինքը տրոհվեց: Եթե այդ մարդիկ դուրս են եկել առանց Գագիկ Ծառուկյանի համաձայնության, այդ ակցիան դասալքություն է, դավաճանություն, բրուտոսություն: Դուրս գալով՝ նրանք, հավանաբար, խուսափել են հաշվեհարդարից: Կարծում եմ՝ հաշվեհարդարի սպառնալիք է եղել: Չի բացառվում, որ «մոդերատորը» տեսել է՝ «Ծառուկյան» դաշինքն ինքնուրույնության նշաններ է ցույց տալիս և նրան թուլացնելու համար էլ թուլացրել է նրան»,- նկատեց բանախոսը:

Ազատ Արշակյանն ընդգծեց՝ «Ծառուկյան»  դաշինքը շահագործվել է, և երբ ընտրված մարդիկ պետք է շնորհակալություն հայտնեին նրան, լքեցին:

«Այստեղ բացակայում է տարրական մարդկային արժանապատվությունը, հարգանքն ու պատասխանատվությունը»,- փաստեց բանախոսը:

Անդրադառնալով Երևանի ավագանու ընտրություններին՝ Ազատ Արշակյանը նշեց՝ «Երկիր ծիրանին» մասնակցում է՝  ավելի շուտ ճանաչվածություն ձեռք բերելու համար, մինչդեռ «Ելք»-ը՝ ԱԺ ընտրությունների արդյունքներն ամրապնդելու:

«Բոլոր երեք ուժերն էլ ներկայացրել են ոչ թե համայն հայության մայրաքաղաքին, այլ գավառական որևէ քաղաքին հարիր ծրագիր»,- ասաց նա: