Ձեր վստահելի աղբյուրը

Բնապահպան Կարինե Դանիելյանը չի հետևում, թե ինչ են առաջարկում Երևանի ավագանու մասնակից կուսակցությունները քաղաքի բնապահպանական խնդիրների լուծման վերաբերյալ:

«Ճիշտն ասած՝ հիասթափված ենք: Խորհրդարանական ընտրությունների ժամանակ մանրամասն ուսումնասիրել էինք մասնակից բոլոր կուսակցությունների՝ այդ ոլորտում առաջարկած ծրագրերը: Հատ ու կենտ լրագրողների էին եկել, այսինքն՝ հետաքրքրություն չկա: Դրա համար մենք էլ չշարունակեցինք»,-Panorama.am-ին ասաց «Հանուն մարդկային կայուն զարգացման» ՀԿ նախագահը:

Նկատենք, որ Դանիելյանի ասուլիսին  ներկա է եղել նաև Panorama.am-ի լրագրողը: Բնապահպանը Երևանի ավագանու ընտրությունների արդյունքում հաղթող թեկնածուին խորհուրդ է տալիս այս ոլորտին մեծ ուշադրություն դարձնել: Նախ պետք է օրենքի նախագիծ մշակել ու ընդունել Կենտրոն վարչական շրջաբնում ընթացող խայտառակ կառուցապատումը դադարեցնելու վերաբերյալ:

«Պետք է դադարեցնել Կենտրոնի խայտառակ խտացումը: Քանդել ես կարծում եմ, էլ հնարավոր չի, բայց գոնե դադարեցնել: Եթե որևէ տեղ՝ ենթադրենք Կոնդում, Ֆիրդուսում հին շինությունները հնարավոր չէ պահպանել, քանդելու դեպքում պետք է միայն կանչապատել, ոչ թե բարձրահարկ շենքեր խցկել ու խցկել»,-ասաց հասարակական գործիչը:

Նա նշում է, որ վերջին տարիներին մայրաքաղաքում կանաչապատման աշխատանքներ են իրականացվում, սակայն բավարար չեն, կանաչ զանգվածի խտացում է պետք, գազոնները պետք է  մավելացնել:

«Հենց որ շենքի առաջին հարկը զբաղեցրել են, միանգամից գազոնը վերացրել են, ծառերը կտրել են: Բավական է անցնել կենտրոնական փողոցներով և կտեսնեք սա: Պետք է ստիպել վերականգնել գազոնը, բնաբաժակով ծառերը»,-ասաց նա:

Դանիելյանին անհանգստացնում է, որ կանաչապատումն արվում է միատեսակ ծառերով, բացի այդ ակացիաներն ու եղևնեիները միմյանցից բավականին հեռու են տնկվում, մինչդեռ Երևանը խիտ կանաչի կարիք ունի:

«Օրինակ, վերջերս Առինջում, Ծառուկյանի օբյեկտի մոտ եկան, հսկա ծառերը քոքահան արեցին, ես փորձեցի կանգնեցնել, ոչինչ չստացվեց, քաղաքապետարան զանգ տվեցի, իրենք որոշեցին չխառնվել: Երեք-չորս այդպիսի մեծ ծառ արմատախիլ արեցին, մյուսները փոքր էին, էլի հանեցին: Ճիշտ է հիմա գեղեցիկ սարքել են, բայց կանաչ զանգվածն անհամեմատ քիչ է: Գեղեցիկ լանդշաֆտ է եղել, բայց քաղաքին գեղեցկությունը միայն բավարար չէ, կանաչ զանգված է պետք, որ օդը մաքուր լինի»,-ասաց ՀԿ նախագահը:

Բնապահպանին Հայաստանում ԱՄՆ դեսպանատան աշխատակիցները տեղյակ են պահել, որ Իսակովի պողոտայում մեծ կաղնիների կողքը քաղաքապետարանի աշխատակիցները փոքրիկ ակացիաներ են տնկել՝ հնարավոր այն մտադրությամբ, որ հետո կաղնիները կտրեն:
«Դեսպանատան աշխատակիցները բողոքել են: Քաղաքապետարանի հետ պետք է հարցը քննարկվի, որ կաղնիները պահպանվեն»,-ասաց նա:

Կ. Դանիելյանին՝ քաղաքապետարանի տրամադրած տվյալների համաձայն, Երևանում մեկ բնակչին բաժին է ընկնում 18-20 քմ կանաչ տարածք:

«Ասում են, որ նույնիսկ 20 քմ-ն են անցնում: Բայց այստեղ խտության հարց կա: Օրինակ, ամբողջ օղակաձև այգին համարվում է ընդհանուր օգտագործման կանաչ տարածք, բայց այսօր Օղակաձև այգին որևէ նորմատիվով կանաչապատ տարածք չի կարող համարվել, որովհետև առնվազն կեսը կառուցապատված է»,-ասաց նա, հիշեցնելով, որ մեկ շնչին բաժին ընկնող կանաչ տարածքի չափը կախված տարբեր առանձնահատկություններից տարբեր է՝ սկսած 24 քմ-ից մինչև 70 քմ: