Ձեր վստահելի աղբյուրը

«Ծառուկյան» դաշինքի թեկնածուների  ինքնաբացարկի դիմումների շուրջ առաջացած իրավիճակը քաղաքագետ Անուշ Սեդրակյանի համար անսպասելի չէր:

«Բնավ անսպասելի չէր: Ամբողջ ընտրական գործընթացում կա՞ր արդյոք մի դետալ, մի շտրիխ, որը նախապես քաղաքականապես ծրագրված չէր, նախատեսված չէր, խնամքով գործարակված չէր: Չկա այդպիսի մի շտրիխ»,-Panorama.am-ի հետ զրույցում ասաց քաղաքագետը:

Նա այն կարծիքին է, որ ԿԸՀ-ում  ինքնաբացարկի դիմումների հայտնվելը, ապա դրանք հետ պահանջելը խոսում է այն մասին, որ բոլոր քաղաքական գործընթացները վերահսկվում են մեկ կենտրոնից:

«Խոսել ֆեոդալական քաղաքական  վերահսկողության մասին արդեն ուշ է: Հիմա յուրաքանչյուր կուսակցության ներսում արագ կարող են աճեցնել ընդդիմացող բևեռ, չեմ ուզում դա ձևակերպել որպես ընդդիմադիր բևեռ, և այդ բևեռը կատարելու է իշխանության կամադրսևորումը: Ամեն  ինչ պարզ է, խնամքով ծածկված ներինտրիգային ծրագիր է»,-ասաց Ա. Սեդրակյանը:

Նա ցավ հայտնեց, որ ինքնաբացարկի դիմումը հետ պահանջած մարդկանց՝ խորհրդարանում հայտնվելու արդյունքում որևէ փոփոխություն ակնկալել հնարավոր չէ:

«Այդ մարդկանց որակը միջինացված նույնն է՝ միջինացված պրոֆեսիոնալ ոչ կոմպետենտ որակ է»,-գնահատեց քաղաքագետը:

Ինքնաբացարկների գործընթացի մեջ, Ա. Սեդրակյանի խոսքով, միայն մի դրական բան կա. «Թեկուզ ձևականորեն որոշակի քաղաքական իրավունքներ պաշտպանվում են»: