Ձեր վստահելի աղբյուրը

Մայր Աթոռ Սուրբ Էջմիածինը Գարեգին Բ Ամենայն Հայոց Կաթողիկոսի օրհնությամբ հնգյակին լույս աշխարհ բերած Կարապետյան ընտանիքին կընծայի  չորս սենյականոց բնակարան։ Panorama.am-ին հայտնեց Մայր աթոռի տեղեկատվական համակարգի ղեկավար Տեր Վահրամ քահանա Մելիքյանը:

Տեր Վահրամն ասաց. «Եկեղեցին միշտ իր ուշադրության կենտրոնում է պահում բազմազավակ ընտանիքների խնդիրները՝ ջանալով հոգևոր խնամքից բացի կարելվույն չափ նաև նյութապես սատարել նրանց»:

Տեղեկանալով հնգյակ ունեցած ընտանիքի բնակության պայմանների մասին՝  Կաթողիկոսը որոշել է աջակցել ընտանիքին և նպաստել փոքրիկների խաղաղ ու անվրդով մանկությանը:

Հիշեցնենք, որ «Էրեբունի» ԲԿ-ում մայիսի 3-ին 23-ամյա մեծամորցի կինը՝ Լուսինե Պողոսյանը լույս աշխարհ էր բերել հնգյակ՝ մեկ տղա և չորս աղջիկ:

Մոր և մանկան առողջության պահպանման գիտահետազոտական կենտրոնի, «Սուրբ Աստվածամայր» և «Էրեբունի»» բժշկական կենտրոնների նորածնային վերակենդանացման բաժանմունքներում բուժվող փոքրիկների վիճակը շարունակում է մնալ կայուն։ Նրանցից մեկը դեռ ծնվելու օրից սկսել է շնչել առանց արհեստական շնչառական սարքի։  Մյուս երկուսին ևս նախապատրաստում են ինքնուրույն շնչառությամբ «ՍԻՊԱՊ» (SIPAP) համակարգին միացնելու համար։ «Մուրացան»  հիվանդանոցային համալիրի նորածնային վերակենդանացման բաժանմունքում բուժվող երկու փոքրիկի (տղայի և ամենից ցածր քաշով ծնված աղջկա) վիճակը շարունակում է մնալ ծայրահեղ ծանր։