Ընտրությունների համար մեր ներդրած գումարները լավ են ծախսվել. ՀՀ-ում ԵՄ պատվիրակության ղեկավար
«Մենք չափազանց բավարարված ենք, որ մեր ներդրած գումարները լավ են ծախսվել»,- լրագրողների հետ հանդիպմանն ասաց Եվրոպական միության պատվիրակության ղեկավար, դեսպան Պյոտր Սվիտալսկին՝ պատասխանելով հարցին, թե Եվրամիությունը ՀՀ-ում ԱԺ ընտրությունների արդյունավետ անցկացման համար գումարներ էր ներդրել, արդյո՞ք արդյունավետ ծախսվեցին այդ գումարները:
Նա նշեց, որ իրենց գումարներով գնել են տեսախցիկներ, նույնականացման սարքեր, որոնք շատ լավ են աշխատել, նույնիսկ իրենց ակնկալիքներից ավելի լավ:
«Զուտ տեխնիկական տեսանկյունից, մենք բավարարված ենք: Բնականաբար, եղել են որոշակի խնդիրներ կապված ուղիղ հեռարձակման ընդհատման, մատնահետքերի սարքերի աշխատանքի խափանման հետ, բայց հիմա վերլուծում ենք բոլոր ստացված զեկույցները, նաև աշխատանքների իրականացմանը հետևող վերահսկող մարմնի եզրակացությամբ՝ տեխնոլոգիաները շատ լավ աշխատել են, քան այլ երկրներում, ավելի լավ, քան ակնկալում էինք»,- նշեց դեսպանը՝ հավելելով, որ հայ ընտրողն այժմ գիտի, որ այդ տեխնոլոգիաների կիրառմամբ կարող է երաշխիքներ ունենալ, որ իր ձայնը չի գողացվում:
ԵՄ պատվիրակության ղեկավարի խոսքով, ընտրական գործընթացի որոշակի խնդիրներ կան, որոնք պետք է հասցեագրել, լուծել ապագայում: Նա նշեց, որ ԵՄ-ն պատրաստ է աշխատելու կառավարության, պետական կառույցների հետ քննարկելու, լուծելու այդ բացերը, որոնք բացահայտվեցին այս ընտրությունների ժամանակ:
«Բոլորն են ընդունում, որ կան խնդիրներ, զարգացումներ, որոնք պետք է տեղի չունենային: Մեզ համար անցնող ընտրությունները ճանապարհի վերջը չէին, մենք էլ պատրաստ ենք շարունակելու մեր աջակցությունը, սակայն ինչ ձևաչափով, ինչպես, դեռ չգիտենք: Համոզված ենք, որ Հայաստանի մեր գործընկերները, կոնկրետ կառավարությունը, շահագրգռված է շարունակելու մեր հետ համագործակցությունը»,- ասաց դեսպանը:
Պյոտր Սվիտալսկին նաև նշեց, որ ընտրությունները ցույց տվեցին քաղաքական համակարգի թերություններն ու թույլ կողմերը, այդ թվում նաև քարոզարշավի իմաստով, բայց դրանք ներպետական խնդիրներ են:
«Կարծում եմ, որ հայկական հասարակությունը, քաղաքական դասը բավականին լուրջ մտածելու և քննարկելու նյութ ունի, որպեսզի ձևավորվի քաղաքական մշակույթ, քաղաքական առաջնորդություն, քաղաքական գործընթացը նոր ձև ստանա»,- հավելեց ՀՀ-ում ԵՄ պատվիրակության ղեկավարը:
Հարակից հրապարակումներ`
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
