Ձեր վստահելի աղբյուրը

«Չորս տարի առաջ մենք մեր թիմով հանդես եկանք «Ավելի լավ Երևան» ծրագրով, այսօր մենք կարող ենք ասել, որ ունենք ավելի լվա Երևան, բայց դա չի նշանակում, որ Երևան քաղաքում չկան խնդիրներ»,- Նախընտրական քարոզչության շրջանակում այսօր ասաց Երևանի քաղաքապետ, ՀՀԿ նախընտրական ցուցակը գլխավորող Տարոն Մարգարյանը՝ Մալաթիա-Սեբաստիա վարչական շրջանի բնակիչների հետ հանդիպմանը։

Ներկայիս քաղաքապետի խոսքով՝  դեռ բազում խնդիրներ մնացել են և այս տարիների ընթացքում շփվելով բնակիչների հետ, լսելով նրանց կողմից բարձրացված հարցերը, խորհուրդները, առաջարկությունները, դրանք ներառել են իրենց նախընտրական ծրագրում։

«Վստահաբար կարող ենք ասել` այն աշխատասեր, բանիմաց ու ճանապարհ անցած թիմով, որ մենք հանդես ենք գալիս, կարող ենք բոլոր ծրագրերը կյանքի կոչել։ Շփվելով մեր բնակիչների հետ՝ հստակ գիտենք, որ Երևան քաղաքում կա քաղաքային տրանսպորտի խնդիր, այդ ոլորտը ճգնաժամ է ապրում։ Այս տարիների ընթացքում ձեռքներս ծալած չենք նստել, ուսումնասիրել ենք միջազգային փորձը և արդեն սկիզբ ենք դրել տրանսպորտի ոլորտում հիմնովին բարեփոխման։ Օր ու գիշեր աշխատելով, մեր թիմն ամեն ինչ անելու է, որ չզիջենք զարգացած ոչ մի քաղաքի»,-ասաց Տարոն Մարգարյանը։

Նա հավելեց, որ քաղաքային իշխանությունը պետք է լինի բնակիչների հետ և նրանց մասնակցությամբ՝ որոշումներ կայացնի։