Ձեր վստահելի աղբյուրը

«Մեզ համար ԵԱՀԿ գրասենյակը Երևանում չափազանց հուսալի, կենսական գործընկեր էր մեր միջոցառումները, ծրագրերն իրականացնելու համար»,-լրագրողների հետ հանդիպմանն ասաց Եվրոպական միության պատվիրակության ղեկավար, դեսպան Պյոտր Սվիտալսկին՝ խոսելով ԵԱՀԿ երևանյան գրասենյակի փակվելու մասին:

Նա համոզված է, որ իրականացված ծրագրերը շատ օգտակար էին, դրանք տվել են իրենց հստակ ներդրումը Հայաստանի ժողովրդավարական գործընթացների զարգացմանը, մարդու իրավունքների պաշտպանությանը, օրենքի գերակայության ձևավորմանը:

«Մեր կարծիքով, ԵԱՀԿ գրասենյակը հավատարիմ է եղել իր մանդատին, կատարել է շատ օգտակար աշխատանք՝ ապացուցելով, թե ինչքան կարևոր է  ԵԱՀԿ ներդրումը,  համոզված ենք, որ ԵԱՀԿ-ի ամենակարևոր արժեքը տեղում ներկա լինելն է, տեղերում աշխատելն է: ԵԱՀԿ-ի գրասենյակը Երևանում դրա լավագույն օրինակներից մեկն էր, կոնկրետ գործնական աշխատանքի, որը կատարվում էր  տեղում: Մենք նաև համոզված ենք, որ հայկական կողմն որպես ընդունող պետության լավագույն օրինակն է  ցուցաբերել, հայաստանյան կողմը ցուցաբերել է առավելագույն համագործակցություն, կառուցողական դիրքորոշում է ունեցել: Շատ իմաստներով Հայաստանի, որպես ընդունող պետություն, դիրքորոշումը եղել է օրինակելի այն իրավիճակում, երբ բազմաթիվ պետություններ հարցականի տակ են դնում ԵԱՀԿ-ի ներկայությունն  իրենց պետության տարածքում, հայկական գործընկերները միշտ եղել են դրա աջակիցը»,- ասաց դեսպանը:

Նա հույս հայտնեց, որ ծրագրերը, միջոցառումները, որոնք իրականացնում էր  ԵԱՀԿ գրասենյակը Երևանում, ապագայում կշարունակվեն, հակառակ դեպքում դա կլինի մեծ կորուստ:

«Հուսով ենք, որ այս աշխատանքները կշարունավեն, Հայաստանը դրա կարիքը ունի, ԵԱՀԿ-ն էլ դրա կարիքն ունի: Անկեղծ ասեմ՝ երևի սա ավելի լուրջ հարված է ԵԱՀԿ-ին, քան Հայաստանին»,- նշեց Եվրոպական միության պատվիրակության ղեկավար, դեսպան Պյոտր Սվիտալսկին: