Ձեր վստահելի աղբյուրը

ՀՀ-ում ԵՄ պատվիրակության կողմից հատկացված դրամաշնորհներից կատարված հափշտակությունների դեպքերը Հայաստանի և ԵՄ միջև համագործակցությունը կարող է ավելի ուժեղացնել և խորացնել ի շնորհիվ հայ քննիչների և Խարդախության դեմ պայքարի եվրոպական գրասենյակի (OLAF) քննիչների սերտ համագործակցության: Լրագրողների հետ հանդիպմանն ասաց Եվրոպական միության պատվիրակության ղեկավար, դեսպան Պյոտր Սվիտալսկին` պատասխանելով  հարցին, թե խարդախության դեպքերը ինչպե՞ս կարող են ազդել ՀՀ-ԵՄ հարաբերությունների վրա:

Նա նշեց, որ դեպքերը բացահայտվել են ԵՄ պատվիրակության կողմից, ինչը չափազանց կարևոր է, ցույց է տալիս, որ ԵՄ ընթացակարգերը, վերահսկման մեխանիզմները աշխատում են լավ: 

«ԵՄ պատվիրակությունը տվալները փոխանցել է մեր մասնագիտացված կառույցին: OLAF-ը իրականացրել է այդ դեպքերի հետ կապված սեփական, ներքին վերլուծությունը, կատարել որոշակի եզրահանգումներ: Սա դրական է խոսում ԵՄ կազմում նմանատիպ անկախ հակակոռուպցիոն մարմնի մասին»,- ասաց դեսպանը՝ հավելելով, որ այս մարմինն իր գործունեությամբ կարող է օրինակ լինել Հայաստանի համար, որ այստեղ էլ ստեղծվի հակակոռուպցիոն անկախ մարմին, որի աշխատանքը կարող է լինել խիստ արդյունավետ, տալ անհրաժեշտ արդյունք:

Պյոտր Սվիտալսկին ասաց, որ OLAF-ն հայտ և առաջարկություններ է ուղարկել ՀՀ քննչական կոմիտեին, որպեսզի սկսվի պաշտոնական հետաքննություն:

«Արդեն տեսել եմ որոշակի հրապարակումներ, այդ խարդախության այս դեպքերը կարող են բացասաբար անդրադառնալ ՀՀ-ԵՄ հարաբերությունների վրա: Ես ունեմ ճիշտ հակառակ կարծիքը: Կարծում եմ, որ համագործակցությունը կարող է ավելի ուժեղանալ և խորանալ ի շնորհիվ համատեղ աշխատանքի, սերտ համագործակցության, որ կա OLAF-ի և Հայաստանի քննչական կոմիտեի միջև: Ողջ ընթացքում OLAF-ի պաշտոնյաները տեղեկացված են հայ քննիչների աշխատանքից»,- նշեց նա:

Պ. Սվիտալսկին նաև ասաց, որ երկու կողմերի շահերից է բխում լրջորեն վերաբերվել նման դեպքերին և ազդակներին, ՀՀ-ԵՄ համագործակցությունը զերծ դարձնել նմանատիպ զարգացումներից: Նա նշեց, որ ԵՄ երկրներում տարեկան մոտ 1 միլիարդ եվրո վատնվում է կոռուպցիոն սկանդալների հետևանքով, բայց ԵՄ-ն բաց է խոսելու դրա մասին, վճռական է պայքարելու կոռոպցիայի դեմ անկախ նրանից, թե որն է դրա աղբյուրը:

Հիշեցնենք, որ ՀՀ քննչական կոմիտեի ՀԿԳ քննության գլխավոր վարչությունում շարունակվում է ՀՀ-ում Եվրոպական միության պատվիրակության կողմից հատկացված դրամաշնորհի գումարներից  առանձնապես խոշոր չափերի հափշտակություն կատարելու դեպքի առթիվ հարուցված քրեական գործի նախաքննությունը:

ՔԿ հաղորդմամբ, նախաքննության ընթացքում ձեռք բերված փաստական տվյալների հիման վրա՝ մի խումբ անձանց կողմից նախնական համաձայնությամբ, ՀՀ-ում Եվրոպական միության պատվիրակության կողմից հատկացված դրամաշնորհներից խարդախությամբ առանձնապես խոշոր չափերի գումարի հափշտակություն կատարելու կասկածանքով 2017 թվականի ապրիլի 26-ին ձերբակալվել է ՀՀ-ում Եվրոպական միության պատվիրակության դրամաշնորհային ծրագրերի համակարգող Մարինե Պապյանը: