Ձեր վստահելի աղբյուրը

Ուկրաինայի մայրաքաղաք Կիևում այսօր կկայանա «Եվրատեսիլ-2017»-ի 1-ին կիսաեզրափակիչ փուլը, որի ընթացքում հայաստանյան ներկայացուցիչ Արծվիկը ելույթ կունենա 16 համարի ներքո: Մրցույթին հնարավոր կլինի հետևել ժամը 23:00-ին Հանրային հեռուստաընկերության և Հանրային ռադիոյի եթերում:

Մրցույթն այս տարի կմեկնաբանեն Առաջին ալիքի հաղորդավարներ Ավետ Բարսեղյանն ու Գոհար Գասպարյանը, իսկ  հայաստանյան միավորները կհայտարարի «Եվրատեսիլ-2016»-ի ներկայացուցիչ Իվետա Մուկուչյանը:

«Եվրատեսիլ-2017»-ի բեմը կշռում է շուրջ 30 տոննա և զբաղեցնում է 350 ք.մ. տարածք:  Այն կառուցելու համար ներգրավված է եղել շուրջ 800 մարդ: Մրցույթի շրջանակում կօգտագործվեն աննախադեպ քանակով ձայնային և լուսային սարքավորումներ: 

Առաջին ալիքի հասարակայնության հետ կապերի բաժնի հաղորդմամբ, Հանրային հեռուստաընկերության ստեղծագործական խմբի որոշմամբ` այս տարվա բեմականացման ընթացքում լեդային էկրանների վրա կներկայացվի հայկական զարդարվեստն ու խորհրդանշական թռչնապատկերները:

Հայկական ժառանգության բացառիկ նմուշները «Հայկական դրոշմազարդ կտավ» և «Հայկական զարդարվեստ» ձեռնարկներից են: Հին զարդանախշերի գեղարվեստական մշակումները բացառիկ իրավունքով տրամադրել է նշված ձեռնարկների հեղինակ Արմեն Քյուրքչյանը:

Արծվիկի հետ բեմում կլինեն երկու պարուհիներ, ովքեր պարային բեմականցման ընթացքում կկրեն հայկական արծաթյա զարդեր եւ ձեռքերի յուրահատուկ շարժմամբ կփորձեն ներկայացնել թռչնի շարժում: Արծվիկի հետ նույն բեմում կլինեն նաև երեք բեք- վոկալիստներ: