Ձեր վստահելի աղբյուրը

Մ. Սարյանի տուն-թանգարանի Ղազարոս և Արաքսի Սարյանների անվան դահլիճում վաղը Աննա Մայիլյան երգարվեստի կենտրոնի մասնակցությամբ տեղի կունենա համերգ՝ նվիրված Հայրենական մեծ պատերազմի հաղթանակի օրվան:  Տուն-թանգարանի ֆեյսբուքյան էջից տեղեկանում ենք, որ համերգին կհնչեն հայ կոմպոզիտորների հայրենասիրական երգերի կատարումներ:

Ի դեպ, նշենք, որ պատերազմական թեման շատ հոգեհարազատ է եղել նկարիչ Մարտիրոս Սարյանին, քանի որ իր որդին ևս պատերազմի մասնակից է եղել:  1941-45 թվականներին Մարտիրոս Սարյանը շատ է աշխատել, «նկարչի զենքն էլ իր վրձինն է, մատիտը, ներկապնակը: Իր երկիրը նա պաշտպանում է իր արվեստով:

^{Մարտիրոս Սարյանը որդու՝Ղազարոսի հետ։ Ղազարոս Սարյանը Հայրենական Մեծ պատերազմի մասնակից է։Նա ծառայել է 7-րդ զենիթա-գնդացրային զորագնդում։ Պարգևատրվել է «Մարտական վաստակների համար» մեդալով, «Կարմիր աստղ» շքանշանով (աղբյուր՝} www.facebook.com/Sarianmuseum)։

«Երկրորդ համաշխարհային պատերազմի  տարիներին (1941 – 1945)  նկարիչը ստեղծագործական հարաբերական  ազատություն ստացավ:  Սարյանը ստեղծեց  մշակույթի գործիչների սքանչելի դիմանկարների շարք (Գ. Աճառյան, Ի. Օրբելի, Ս. Մալխասյան, Ա. Խաչատրյան, Մ. Լոզինսկի, Ա. Էֆրոս): Իսկ նկարչի քաղաքացիական դիրքորոշումը  հանդիսացավ այն փաստը, որ նրա կրտսեր որդին մեկնեց ռազմաճակատ: Չէ որ  որոշվում էր նաև Հայաստանի ճակատագիրը:

Այդ տարիների ապրումները իրենց արտահայտությունն են գտել «Նկարչի կյանքից: Լուսիկ Սարյանի դիմանկարը» աշխատանքում, ինչպես նաև  նշանավոր «Երեք հասակ: Ինքնադիմանկար»-ում:

Այս աշխատանքները նորարարական դարձան դիմանկարի ժանրում: Արևելյան գեղանկարչությանը բնորոշ տարաժամանակյա իրադարձությունների համադրման միջոցով նկարիչը բացահայտում է իր կերպարների  ներքին ապրումներն ու հոգեբանական վիճակը: Այսպես,  նկարչի կնոջ ձեռքին պատկերված պտուղը հայելում արտացոլվում է որպես որդուց սպասվող նամակ. վեց ամիս շարունակ ծնողները լուր չունեին Կիևում, առաջնային դիրքերում գտվող իրենց որդուց: Իսկ հարազատ՝ հազարամյա պատմություն ունեցող իր երկիրը, որը պետք էր պաշտպանել թշնամուց, նկարիչը համադրում է իր կյանքի  պատմության հետ` ներկայացնելով այն երիտասարդ, միջին և ալեհեր տարիքների զուգակցմամբ: Նկարչի զենքն էլ իր վրձինն է, մատիտը, ներկապնակը: Իր երկիրը նա պաշտպանում է իր արվեստով:

Պատերազմի հաղթանակի և որդու վերադարձի կապակցությամբ  Սարյանը ստեղծեց  նատյուրմորտի  ժանրում իր ամենամեծ կտավը՝ «Հայրենական Մեծ պատերազմի հայ մարտիկներին: Ծաղիկներ»»,- կարդում ենք Մ. Սարյանի տուն-թանգարանի կայքի «Կենսագրություն» բաժնում:

Նկարչի կյանքից: Լ.Սարյանի դիմանկարը (1941)

Ինքնադիմանկար: Երեք հասակ (1942)

Ծաղիկներ Հայրենական մեծ պատերազմի հայ մարտիկներին (1945)