Ձեր վստահելի աղբյուրը

ԵԱՀԿ երևանյան գրասենյակի փակումը հնարավոր է ազդի Հայաստանում իրականացվող ծրագրերի վրա, իսկ քաղաքական առումով ՀՀ- ԵԱՀԿ հարաբերությունները որևէ կերպ չեն կարող վնասվել, որովհետև գրասենյակը չի փակվել Հայաստանի նախաձեռնությամբ: «Մեդիա կենտրոնում» «ԵԱՀԿ երևանյան գրասենյակի փակման պատճառներն ու հետևանքները» թեմայով քննարկմանն ասաց ԱԺ պատգամավոր Էդմոն Մարուքյանը:

«Ամեն դեպքում գրասենյակի փակումը Հայաստանի համար, Հայաստանում իրականացվող բարեփոխումներն առաջ մղելու համար լուրջ կորուստ է, վնաս: Մյուս կողմից, կարծում եմ, որ մենք պետք է հիմա փորձենք այլ ալիքներով այդ ռեսուրսը բերել Հայաստան,  նաև ստանալով որոշակի իմաստով «զոհի» կարգավիճակ միջազգային հանրության  աչքերում. ԵՄ անդամ երկրները, ԱՄՆ-ն,   բոլորը ականատեսն են եղել, թե Ադրբեջանն ինչ ձևով է գնացել այդ գրասենյակի փակմանը անգամ իրենց կողմից դրված բոլոր պայմանները բավարարելուց հետ»,-ասաց Է. Մարուքյանը:

Նրա խոսքով, սա պետք է դիտարկել միջազգային կոնտեքստում որպես հարված ժողովրդավարությանը, մարդու իրավունքներին, իրավունքի գերակայնությանը և այդ կոնտեքստում Հայաստանին աջակցություն ցուցաբերել:

«Այսինքն  հիմա արդեն գրասենյակը փակվել է, այլ բան չենք կարող անել, քան փորձել անդամ պետություններին ուղղորդել Եվրամիության, Եվրոպայի խորհրդի կամ այլ ալիքներով Հայաստան  բերել նույն ծրագրերը, որն, ըստ էության, բացառված չէ, որի հետ կապված քննարկումներ կան այս պահին»,- ասաց քաղաքական գործիչը:

Նա համակարծիք է ՀՀ-ում ԵՄ դեսպանի հայտարարությունը, որ երևանյան գրասենյակի փակումը հարված էր հենց ԵԱՀԿ գրասենյակին. «Իհարկե, միանշանակ հարված էր ԵԱՀԿ-ին, որովհետև այդ կազմակերպությունը որպես հավաքական մարմին չկարողացավ այնպես անել, որ իր գրասենյակը չփակվի Հայաստանում, հարված էր ավստրիական նախագահությանը, որը փորձում էր ամեն ինչ անել, որ չփակվի գրասենյակն իր նախագահության օրոք, բայց փակվեց: Բավականին խոսուն հայտարարություն էր»:

Քննարկմանը ներկա Եվրասիա Համագործակցություն հիմնադրամի գլխավոր տնօրեն Գևորգ Տեր-Գաբրիելյանն ասաց, որ ԵԱՀԿ-ՀՀ քաղհասարակության հարաբերությունները կշարունակվեն, բայց ռազմավարական առումով պետք է հասկանալ, թե ինչու Ադրբեջանը դա արեց, ինչ է դա նշանակում:

«Ռուսաստանը մեծ դեր է ունեցել ԵԱՀԿ գրասենյակի փակման գործում, քանի որ Պուտինի շահը նույնպես դա է՝ ինչքան հնարավոր է, միջազգային ցանցերից Հայաստանին հեռու պահել, ինչին ձգտում է նաև Ադրբեջանը»,- հավելեց նա: