Ձեր վստահելի աղբյուրը

«Ամեն ինչ պետք է անեմ, որ բրոնզը դառնա ոսկի»,- այսօր լրագրողների հետ զրույցում ասել է ըմբշամարտի Եվրոպայի առաջնության բրոնզե մեդալակիր Գրիգոր Գրիգորյանը:

«Ընդհանուր մարզավիճակս շատ լավ էր և լավ պատրաստվել էի, որ կարողանամ հաղթել: Երկու շատ դժվար գոտեմարտ ունեցա վրացի և թուրք ըմբիշների հետ: Վրացու դեպքում շատ լարված էի, բայց նաև վստահ»,-ասել է նա:

Գրիգոր Գրիգորյանի խոսքով, թուրք ըմբիշի հետ մրցակցությանը հոգեբանորեն  տրամադրվել էր.

«Բայց չկարողացա հաղթել, ինչ-որ տեղ չստացվեց, երեւի նա ինձանից լավ էր պատրաստված: Բայց ես բրոնզով չեմ սահմանափակվելու»:

Ասուլիսի մյուս բանախոս Եվրոպայի առաջնության բրոնզե մեդալակիր Վալոդյա Ֆրանգուլյանը նշեց, որ տակտիկապես մի փոքր սխալվել է:

«Մասնակցում էինք հաղթելու համար: Բայց բրոնզն էլ է ուրախալի, քանի որ երկար ժամանակ չէր հաջողվում մեծահասակների Եվրոպայի առաջնությունում մեդալ նվաճել: Այդ առիթով շատ ուրախ եմ իմ և տղաների համար»,-ասաց Ֆրանգուլյանը:

Մեդալակիր մարզիկն ասաց, առաջնությանը լավ էր պատրաստվել, ճանաչում էր բոլոր մրցակիցներին:

«Գիտեի` իմ քաշային կարգում չկա այնպիսի ըմբիշ, որին չկարողանամ հաղթել: Նույն սկզբունքով գոտեմարտում էի:  Սակայն, կիսաեզրափակիչ փուլը չստացվեց ռուս ըմբիշի հետ և երկրորդ անգամ չկարողացա հաղթել նրան: Գոտեմարտելու ընթացքում ես զգում եմ, որ կարող եմ ավելին, բայց այս անգամ տակտիկապես մի փոքր սխալվեցի: Հավաքների ընթացքում կշտկեմ, իսկ արդյունքը ցույց կտա աշխարհի առաջնությունը»,- նշեց նա: