Ընտրություններին ընդառաջ՝ բրայլյան գրատեսակով, խոշոր տառաչափով ձեռնարկներ, քվեաթերթիկի կաղապար
ՀՀ կենտրոնական ընտրական հանձնաժողովը մայիսի 14-ին կայանալիք Երևանի ավագանու ընտրություններին տեսողության պատճառով քվեարկությանը մասնակցելու դժվարություններ ունեցող քաղաքացիների համար մշակել է բրայլյան գրատեսակով և խոշոր տառաչափով ձեռնարկներ, ինչպես նաև քվեաթերթիկի հատուկ կաղապար: Ձեռնարկներն այսօր հանձնվեցին «Հայաստանի կույրերի միավորում» հասարակական կազմակերպությանը, որի միջոցով բաժանվելու են հասցեատերերին:
ԿԸՀ նախագահ Տիգրան Մուկուչյանն ասաց, որ ԿԸՀ-ն կարևորելով յուրաքանչյուր ընտրողի տեղեկացված լինելու իրավունքը, այս անգամ ևս Երևանի ավագանու ընտրություններին նախընթաց մշակել է համապատասխան ուղեցույցներ այն քաղաքացիների համար, ովքեր տեսողության հետ կապված խնդիրներ ունեն, բայց հասարակության լիարժեք անդամ են, ունեն լիարժեք քվեարկելու իրավունք: Նրա խոսքով, ուղեցույցները հնարավորություն կտան լիարժեք իրազեկված լինել քվեարկության կարգին, իրականացման մեխանիզմներին, իսկ կաղապարները՝ ինքնուրույն իրականացնելու քվեարկությունը:
Նշենք, որ կաղապարը նույն չափն ունի, ինչ սովորական քվեաթերթիկը: Կաղապարի վրա բրայլյան գրատեսակով գրված է ընտրություններին մասնակցող քաղաքական ուժերի անունները՝ նույն հերթականությամբ, ինչ քվեաթերթիկում։
Կաղապարի մեջ դրվում է քվեաթերթիկը և քաղաքացին կաղապարի օգնությամբ ընտրում է այն ուժին, ում ցանկանում է իր ձայնը տալ։ Նշում է և կաղապարի վրա թողնված փոսիկի միջոցով նշումն անմիջապես արվում է քվեաթերթիկի վրա:
«Կարևորում եմ այդ կաղապարների առկայությունը, որոնք մշակվել են հենց կազմակերպության տպարանում, բաժանվելու է Երևանի բոլոր 474 տեղամասային հանձնաժողովներին: Հաշվի է առնված այն, որ երբ կաղապարից դուրս հանվի քվեաթերթիկը, տեղադրվի ծրարի մեջ ու գցվի քվեատուփ, հետագայում հնարավոր չի լինի նույնականացնել, թե որ ընտրողն է այդ քվեաթերթիկով կատարել ընտրություն, որովհետև կաղապարն օգտագործվում է բացառապես քվեաթերթիկը լրացնելու համար»,- ասաց ԿԸՀ նախագահը:
«Հայաստանի կույրերի միավորում» հասարակական կազմակերպության փոխնախագահ Մարտին Սարգսյանը նշեց, որ հերթական անգամ Կենտրոնական ընտրական հանձնաժողովը կարևորել է տեսողության խնդիրներ ունեցողների՝ ընտրություններին պատշաճ, ինքնուրույն մասնակցելու խնդիրը, պատրաստել նման տեղեկատվական ձեռնարկներ և կաղապարներ: Նա նշեց, որ խորհրդարանական ընտրությունների ժամանակ չկային կաղապարներ, ինչի պատճառով շատ էր խոսվում, թե տեսողության խնդիրներ ունեցողներին թույլ չեն տվել ինքնուրույն քվեարկել. «Այս կաղապարները հնարավորություն կտան, որ նման մարդիկ ինքնուրույն կատարեն իրենց քվեարկությունը, և տեսողության խնդիրներ ունեցող մարդկանց անուններն արդեն քիչ կշահարկվի կամ ընդհանրապես չի շահարկվի»:
Ձեռնարկների, կաղապարների տպագրությունն իրականացվել է հենց միավորման տպարանում:
«Հայաստանի կույրերի միավորում» հասարակական կազմակերպության հրատարակչության տնօրեն Թելման Բոյաջյանն ասաց, որ ԿԸՀ-ն իր այս քայելով նպաստել է մարդու իրավունքների պաշտպանության իրականացմանը, օգնել այն քաղաքացիներին, ովքեր տեսողության պատճառով դժվարությունների են հանդիպում ընտրական գործընթացներին մասնակցելիս:
«Ձեռնարկը նպաստում է, որ նման քաղաքացիները կարողանան պատշաճ և ինքնուրույն իրացնել իրենց քաղաքացիական պարտքը, իրացնեն իրենց ընտրական իրավունքը: Դա նաև մեզ ընձեռված գործնական աշխատանքի և վաստակելու հնարավորություն է»,- նշեց նա:
Բրայլյան գրատեսակով ձեռնարկը տպագրվել է 300 օրինակով, խոշոր տառաչափով ձեռնարկը՝ 1000, կաղապարներն այնքան, որքան տեղամաս կա Երևանում:
ԿԸՀ նախագահը նաև տեղեկացրեց, որ մշակվել և արդեն նախապատրաստվել է համապատասխան ռադիո հաղորդագրություններ՝ կարճ տևողությամբ, որոնք նույնպես բացատրում են գրանցման, քվեարկության կարգը: Տ. Մուկուչյանն ասաց, որ ինչպես նախորդ ընտրությունների ժամանակ, այս անգամ էլ տեսողության հետ կապված խնդիրներ ունեցող քաղաքացիները կարող են ընտրողների ցուցակում ստորագրելու համար օգտագործել իրենց ֆաքսիմիլե ստորագրությունը՝ անհարկի դժվարություններ չկրելու համար: Տեղամասերում կլինեն նաև ոսպնյակներ, որոնք փոխարինում են ակնոցներին:
