Ձեր վստահելի աղբյուրը

«Չեմ ուզում առաջ ընկնել, բայց իմ կարծիքով, առաջին ներդրումները կլինեն վերականգնվող էներգետիկայի ոլորտում»: Կառավարության նիստի ավարտից հետո լրագրողների հետ ճեպազրույցում հայտարարեց տնտեսական զարգացման և ներդրումների նախարար Սուրեն Կարայանը:

Նրա խոսքով, Հայաստանում ներդրումներ կատարելու ուղղությամբ բավականաչափ ծրագրեր են սկսել իրականացվել:

«Մոտ ժամանակներս արդեն վիճակագրություն էլ կհրապարակվի, թե ինչքան օտարերկրյա ներդրումներ են եղել»,-ասաց նախարարը, ավելացնելով, որ ներդրումային ակտիվությանը նպաստել են կատարված փոփոխությունները:

Այս պահի դրությամբ իրականացվել է 80 մլն դոլարի ներդրում, ստեղծվել՝ 1800 աշխատատեղ։
Ընդհանուր առմամբ, ներկայացվել է ավելի քան 70 ներդրումային ծրագիր՝ 95 մլրդ դրամի ներդրումների ակնկալիքով:

Կարայանն ասաց, որ գրեթե բոլոր ոլորտներում էլ ակտիվություն է նկատվում, դրանց ազդեցությունը բնակչությունը կզգա այն ժամանակ, երբ աշխատատեղեր ստեղծվեն:

«Արդեն աշխատատեղեր ստեղծվում են, ակնկալում ենք, որ այս տարի ներդրումային ծրագրերի իրականացման պարագայում կստեղծվեն 10 հազար աշխատատեղեր»,-ասաց նա: