Ձեր վստահելի աղբյուրը

«Կոալիցիոն նոր հուշագիրը վերահաստատում է համագործակցությունն ու նախորդ փաստաթղթում ներառված դրույթների նկատմամբ պատասխանատվությունը»: ՀՀ նախագահի նստավայրում կոալիցիոն հուշագրի ստորագրումից հետո լրագրողների հետ հանդիպմանը հայտարարեց ՀՅԴ ԳՄ ներկայացուցիչ Աղվան Վարդանյանը, ապա ընթերցեց հուշագրի առաջին պարբերությունը.  «Վերահաստատելով 2016 թվականի փետրվարի 24-ին երկու կուսակցությունների միջև կնքված քաղաքական համագործակցության մասին համաձայնագրին իրենց հավատարմությունը և դրանում ամրագրված դրույթների պատասխանատվությունը»:

Նրա խոսքով, ՀՀԿ-ի հետ ստորագրած երկու փաստաթղթերը դառնում են միմյանց լրացնող ու շարունակող:

«Հենց այս պատճառով նախորդ փաստաթղթի բազմաթիվ դրույթներ ու մանրամասներ այստեղ չեն ներառված: Այստեղ ներառված են հիմնական ուղղությունները»,-ասաց Վարդանյանը:

ՀՀԿ փոխնախագահ Արմեն Աշոտյանն էլ լրացրեց, որ երկու փաստաթղթերում սկզբունքային տարբերություններ կան:

«Առաջին փաստաթուղթը նախընտրական էր, հետհանրաքվեային, հետևաբար իր գործունեության հետ կապված չգրված սահմանափակումներ ուներ` կախված այն բանից, թե ինչ արդյունքներ կգրանցվեն խորհրդարանական ընտրություններում: Նոր համաձայնագիրը լիարժեք կոալիցիոն համաձայնագիր է այն տեսանկյունից, որ ամրագրում է գործունեության ժամկետ, որն ամբողջությամբ համընկնում է Ազգային ժողովի լիազորությունների հետ: Այս տեսակետից նաև մանրամասն ամրագրում է խորհրդարանական հանրապետությանը բնորոշ ներկոալիցիոն համագործակցության նոր էլեմենտներ, որոնք Հայաստանում մինչ այդ  գոյություն չունեին»,- նշեց ՀՀԿ փոխնախագահը՝ բերելով օրինակ. պարտավորվել են  երկու կողմերով  Սահմանադրությունից բխող օրենքների, սահմանադրական նշանակություն ունեցող որոշումների հարցում որդեգրել կոնսենսուսի կամ համախոհության սկզբունքը, թույլ են տալիս  իրար որոշակի պարագաներում  ունենալ քաղաքական տարաձայնություններ, որոնք կարող են նաև հատուկ կարծիքի ձևով արտահայտվել, սակայն կոալիցիայի որոշումները  դառնում են պարտադիր իշխանական  բոլոր օղակների համար:

«Կարծում եմ՝ այս տեքստն իրականում խորհրդարանական հանրապետության ներսում  կոալիցիոն համագործակցության  տեսակետից  աննախադեպ է՝ ելնելով  համագործակցության մշակույթի էլեմենտներից: Եզակի երևույթ է Հայաստանի քաղաքական կյանքում, երբ  նախընտրական կոալիցիան վերարտադրվում է ընտրություններից հետո»,- ասաց Ա. Աշոտյանը:

Նրա ներկայացմամբ, կոալիցիոն հուշագիրը հնարավորություն է տալիս խորհրդակցությունների միջոցով ներկայացնել այս կամ այն պաշտոնների համար կուսակցությունների կողմից թեկնածուներ, որոնք պետք է լինեն պարտադիր կերպով ներկայացված հենց  տվյալ կուսակցությունների կողմից, որոնց այս կամ այն պորտֆելը, այս կամ այն պաշտոնը բաժին է հասնում ընդհանուր պատասխանատվության ներքո:

Աղվան Վարդանյանն ասաց, որ այս հուշագրում որևէ պաշտոնի մասին խոսք չկա, կա միայն մեկ բացառություն, որ Հայաստանի վարչապետ առաջադրելու իրավունքը պատկանում է ՀՀԿ-ին:

«Մյուս բոլոր խնդիրները կքննարկվեն ըստ ժամանակացույցի, ժամկետների»,- նշեց նա:

Պատասխանելով հարցին, թե ի՞նչ սկզբունքով է ներկայացված լինելու կոալիցիան Ազգային ժողովի ղեկավար կազմում, Ա. Աշոտյանն ասաց, որ Սահմանադրությունն ու Ընտրական  օրենսգիրքը նախագծել են հաշվարկման, բաշխման մեխանիզմներ, թե որ քաղաքական ուժը ձայների ինչպիսի քվեների դեպքում քանի և ինչ տեսակ պորտֆելներ կարող է ունենալ:

«Այս հարցի երկրորդ հարթությունը քաղաքական է: Այն խորհրդակցությունները, որոնք ես հիշատակեցի որպես գործադիր իշխանության կազմավորման մեխանիզմ, կարող են օգտագործվել նաև իշխանության այլ ճյուղերում համագործակցության ձևաչափերը  ճշգրտելու համար»,- նշեց ՀՀԿ փոխնախագահը:

Հարցին, թե ինչո՞ւ հուշագիրը կրկին ստորագրել եք հենց դուք, Արմեն Աշոտյանն ասաց. «Որովհետև մեր ձեռքը՝ իմ և պարոն Վարդանյանի, թեթև էր»:

Հիշեցնենք, որ 2016 թ. փետրվարի 24-ին ՀՀԿ-ի և ՀՅԴ-ի միջև կնքված Քաղաքական համագործակցության համաձայնագիրը նույնպես ստորագրել էին  ՀՀԿ նախագահի տեղակալ Արմեն Աշոտյանը և ՀՅԴ ԳՄ ներկայացուցիչ Աղվան Վարդանյանը: