Ձեր վստահելի աղբյուրը

Հայաստանում ներդրվում է ազդարարման ինստիտուտը: ՀՀ Կառավարության այսօրվա նիստում, ներկայացնելով «Ազդարարման համակարգի մասին» և հարակից մի շարք օրենքներում ու օրենսգրքերում կատարվող փոփոխությունների փաթեթի նախագիծը,  հայտարարեց ՀՀ արդարադատության նախարար Արփինե Հովհաննիսյանը:

Նա նշեց, որ կստեղծվի միասնական էլեկտրոնային հարթակ, որը հնարավորություն կընձեռի քաղաքացուն անանուն կերպով կոռուպցիոն բնույթի դեպքի մասին իր ունեցած տեղեկատվությունը ազդարարել իրավասու պետական մարմնին:

«Մենք, ՀՀ քրեական դատավարության օրենսգրքով, նախատեսել ենք նաև ազդարարների պաշտպանության երաշխիքներ, այն նույն երաշխիքները, որոնք տրամադրվում են քրեական դատավարությանը մասնակցող անձանց»,-ասաց նախարարը:

Նրա խոսքով, օրինակ՝ անձին պաշտոնապես նախազգուշացնելը, ումից սպասվում է պաշտպանվող անձի նկատմամբ բռնության վտանգ կամ այլ հանցանքի կատարում, պաշտպանվող անձի ինքնությունը հաստատող տվյալները պաշտպանելը, պաշտպանվող անձի անձնական անվտանգությունն ապահովելը, բնակարանը և այլ գույքը պահպանելը,  պաշտպանվող անձին անհատական պաշտպանության միջոցներ տրամադրելը և վտանգի մասին հայտնելը և այլն:

Արփինե Հովհաննիսյանն այս ինստիտուտի ներդրումը  համարեց հեղափոխական քայլ հակակառուպցիոն փաթեթի շրջանակում: