Ձեր վստահելի աղբյուրը

Մեր երկրի կրթական համակարգը պետք է ապահովի միջազգային ասպարեզում մրցունակ կադրեր, որոնք կապահովեն մեր երկրի զարգացումը: Կառավարության նիստում հայտարարեց վարչապետ Կարեն Կարապետյանը:

«Ակնհայտ է, որ անհրաժեշտ են կառուցվածքային ու բովանդակային փոփոխություններ հանրակրթության, միջնակարգ ու բարձրագույն կրթության համակարգում»,-ասաց կառավարության ղեկավարը:

Հաշվի առնելով դրանք, նա հանձնարարեց կրթության և գիտության նախարար Լևոն Մկրտչյանին 15-օրյա ժամկետում կառավարության աշխատակազմ ներկայացնել քաղաքային դպրոցների օպտիմալացման վերաբերյալ առաջարկություններ:

Նրա խոսքով, առաջարկությունները ներկայացնելիս պետք է հաշվի առնվեն ուսուցիչների օպտիմալ ծանրաբեռնվածությունն ու դպրոցներում ուսումնական գործընթացի կազմակերպման երկրորդ հերթի բացառումը:

Վարչապետն ասաց, ֆինանսների նախարարությանը պետք է ներկայացնել հանրակրթական ուսումնական հաստատությունների ֆինանսավորման նոր բանաձևը, որը կապահովի հանրային միջոցների թափանցիկ, արդարացի բաշխումը:

«Մեկ ամսյա ժամկետում կառավարության ու շահագրգիռ կողմերի հետ քննարկել բուհերի անձեռնմխելի ֆոնդերի ձևավորման սկզբունքների ու օրենսդրական նախադրյալների ստեղծման վերաբերյալ նախագիծը: Երկուամսյա ժամկետում կառավարության աշխատակազմի առաջարկությունների հիման վրա լրամշակել բարձրագույն կրթության մասին օրինագիծը, չորսամսյա ժամկետում մշակել ուսանողների սոցիալական աջակցության ու կրթաթոշակների տրամադրման նոր սկզբունքներ»,-հանձնարարությունները շարադրեց գործադիրի ղեկավարը:

Պետք է ուսումնասիրվեն նաև արհեստագործական ուսումնական հաստատությունների վիճակն ու ներկայացվեն դրանց խոշորացման առաջարկություններ:

Վարչապետի երկրորդ հանձնարարականը բուհերում ծրագրային հավատարմագրման գործընթացը պարտադիր դարձնելու ու դրա արդյունավետությունը բարձրացնելու վերաբերյալ է: Բուհերի կառավարման արդյունավետության ցուցանիշների գնահատման հայեցակարգը պետք է կառավարություն ներկայացվի երեքամսյա ժամկետում, դրա հետ պետք է ներկայացվեն ճանապարհային քարտեզ ու ժամանակացույց. «Հաշվի առնելով մեր կրթական համակարգի առջև ծառացած մարտահրավերները՝ բուհ-տնտեսություն կապը ապահովելու համար»: