Ձեր վստահելի աղբյուրը

Կենտրոն վարչական շրջանում՝ Ամիրյան փողոցում երևանցիների հետ հանդիպման ժամանակ քաղաքապետ Տարոն Մարգարյանը շնորհակալություն հայտնեց նրանց քարոզարշավի ընթացքում իրեն ու իր թիմին ջերմ ընդունելու համար:

«Մենք չենք եկել խոստումներ տալու, մեր թիմը երբեք խոստումներով հանդես չի գալիս, այլ կատարած աշխատանքով»,-ասաց Երևանի ավագանու ընտրություններում ՀՀԿ ընտրական ցուցակը գլխավորող Տարոն Մարգարյանը:

Նա նշեց, որ պատրաստել են քաղաքի զարգացման հնգամյա ծրագիր, իսկ «բանիմաց, փորձառու» թիմը կօգնի ծրագրում առկա դրույթները կյանքի կոչել: Քաղաքապետն ասաց, Երևանում խնդիրները շատ են, չորս տարվա ընթացքում չեն կարողացել  մի քանի տասնամյակի ընթացքում կուտակված խնդիրները լուծել:

«Դրանք ներառել ենք մեր նախընտրական ծրագրում: Համոզված ենք, որ ծրագիրը հավակնոտ է ու իրատեսական: Մեր թիմը քաղաքային իշխանության կառավարման  ոլորտում փորձ է ձեռք  ու կրող է ծրագիրը կյանքի կոչել»,-ասաց քաղաքապետը, ավելացնելով, որ չի խուսափում խոսել
խնդիրների, թերացումների , ինչպես նաև իրականություն չդարձած ծրագրերի մասին:

Ասաց, այսօր էլ պարզ ճակատով խնդրում են քաղաքացիներից հնարավորություն՝ սկսած աշխատանքն ավարտին հասցնելու համար:

«Վստահաբար ասում եմ, ամեն ինչ անելու ենք մեր մեծ տունը միասին կառուցելու համար: Կուտակված խնդիրները լուծենք, հանգիստ սրտով փոխանցենք մեր մատաղ սերնդին»,-ասաց նա:
Մարգարյանի խոսքով, Երևանի սրտում՝ Կենտրոնում ապրող քաղաքացիները տեսել են իրենց սրտացավությունը, շատ են հանդիպել, լսել խորհուրդները:

«Մեզ անհրաժեշտ է ժամանակ: Հինգ տարին բավարար ժամանակ է, որ Երևանը մի քանի քայլ առաջ գնա»,-ասաց  նա, վստահություն հայտնելով, որ երևանցին իր վստահության քվեն տալու է այն ուժին, որն ունի փորձ, կատարել է աշխատանք, ով պատրաստ է ծառայել երևանցուն: