Ձեր վստահելի աղբյուրը

Ստամբուլահայերը change.org–ում փոխպատրիարք արք. Արամ Աթեշյանի դեմ ստորագրահավաք են սկսել։

Ստորագրահավաքի հեղինակները պահանջում են եկեղեցուց հեռացնել արք. Արամ Աթեշյանին և հետ վերցնել նրա հոգևոր կոչումները։

Ճշտելու՝ տեղյա՞կ են արդյոք Մայր Աթոռ Սուրբ Էջմիածնում նշված գործընթացին և ինչպես են դրան վերաբերում, Panorama.am-ի թղթակիցը զրուցեց Մայր Աթոռի տեղեկատվական համակարգի տնօրեն Տեր Վահրամ Մելիքյանի հետ։

Վերջինս նշեց, որ Հայ առաքելական եկեղեցին չի մեկնաբանում այս տեղեկությունը։

«Հարցերը պետք  է ուղղել պատրիարքական տեղապահին։ Իսկ հետո, եթե անհրաժեշտություն լինի, Մայր Աթոռը մեկնաբանություն կներկայացնի։ Ես այս պահին որևէ մեկնաբանություն չեմ տալիս»,- ասաց մեր զրուցակիցը։

Թուրքագետ Ռուբեն Մելքոնյանն էլ մեզ հետ զրույցում նշեց, որ ստամբուլահայերի ստորագրահավաքի նախաձեռնությունը կարելի է տեղավորել ոչ այնքան իրավական, որքան հասարակական բողոքի դրսևորման համատեքստում։

«Քանի որ Թուրքիայի հայ համայնքը դիրքորոշում հայտնելու մեծաթիվ հարթակներ չունի, օգտագործում է բոլոր հնարավոր ուղիները՝ այդ թվում՝ 21-րդ դարի տեխնոլոգիաների ընձեռած։ Սա շատ բնական է, այլ բան է, որ թուրքական կառավարությունը դժվար թե հաշվի առնի ստամբուլահայերի բողոքը»,- նկատեց Ռուբեն Մելքոնյանը։

Թուրքագետի համոզմամբ, հարևան երկրիիշխանությունները տեղի չեն տա որևէ ստորագրահավաքի կամ հանրային մեկ այլ բողոքի և Աթեշյանի հարցում կառաջնորդվեն Թուրքիայի շահերից բխող սցենարով։

«Սահմանադրությամբ բռնապետության տարրեր ամրագրած երկրի համար քաղաքացիական դժգոհության ձայնն առ ոչինչ է։ Աթեշյանն իր հերթին հարցը միտումնավոր տեղափոխել է ոչ կառուցողական դաշտ՝ շատ լավ հասկանալով, որ այնտեղ միայն թուրքանպաստ լուծում է  հնարավոր»,- ամփոփեց մեր զրուցակիցը։