«Գյուղը պահողը դպրոցն է». մտավորականներն օպտիմալացման մասին

Կրթություն, գիտություն 11:52 13/05/2017 Հայաստան

«Արտագաղթի առջև կանգնած մեր ժողովրդի համար դպրոցների օպտիմալացումը բերելու է գործազրկության, ինչն ավելի շատ վնաս կբերի հանրությանը»,-այսօր լրագրողների հետ հանդիպմանը նման կարծիք հայտնեց Հայաստանի պետական մանկավարժական համալսարանի «Զարգացման և կիրառական հոգեբանության» ամբիոնի վարիչ Սամվել Խուդոյանը:

Հոգեբանի խոսքով՝ օպտիմալացման հետևանքով ջրի գնով տարածքներ են յուրացվում, ինչը հին բարի ավանդույթ է դարձել մեր երկրում:

«Պետք է մի քիչ հեռանկարային նայել հարցին: Եթե հույս ունենք, որ երկիր տնտեսությունը լավանալու է, ժողովրդի քանակն է ավելանալու, ապա դպրոցների կարիքը նորից զգացվելու է: Գյուղերի դպրոցները գյուղը պահող են, լուրջ հաշվարկ պետք է արվի այդ ուղղությամբ, միայն քարզետային կողմից չպիտի նայել հարցին»,-ասաց Խուդոյանը:

Հայաստանի գրողների միության նախագահ Էդվարդ Միլիտոնյանը նշեց. «Օպտիմալացման նպատակն է բյուջեն ազատել որոշակի պարտականնություններից, հավելյալ գումարով հարստացնել, բայց արդյոք հաշվարկված է բարոյական, դեմոգրաֆիկ կողմը, արդյոք մտածել են սահմանամերձ գյուղերի երեխաների համար են, ինչպես են գնալու կողքի գյուղի կամ քաղաքի դպրոց, սրանք ավելի կարևոր հարցեր են, քանի բյուջեի լրացումը»:

Միլիտոնյանը հիշեցրեց, որ նախկինում գյուղերում մշակույթի տներ կային, դրանք էլ սեփականաշնորհեցին, հիմա էլ դպրոցներ օպտիմալացնելով գյուղը զրկվելու է իր մտավոր դիմագծից:

«Կացնային մեթոդով մեր հոգևոր թելերն ենք կտրելու: Հարցին պետք է նայել երկու կողմից՝ երկրի անվտանգությունը թե զինված, թե հոգևոր պաշտպանության տեսանկյունից»,-ասաց ԳՄ նախագահը:

Բանախոսները համակարծիք էին, որ մայրաքաղաքում դպրոցների օպտիմալացման հարցը ևս սխալ է:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: