Ձեր վստահելի աղբյուրը

Երևանի ավագանու ընտրություններում ՀՀԿ շտաբի պետ, կուսակցության խոսնակ Էդուարդ Շարմազանովը լրագրողների հետ հանդիպման ժամանակ ՀՀԿ կենտրոնական շտաբի անունից դրական գնահատեց Երևանի ավագանու ընտրությունները:

«Ընտրությունները ևս մեկ անգամ վերահաստատեցին, որ Հայաստանը անշեղորեն ընթանում է ժողովրդավարության ճանապարհով»,- նշեց նա:

Նախ անդրադառնալով նախընտրական քարոզարշավին, շտաբի պետը նշեց, որ քաղաքապետի ՀՀԿ-ի թեկնածու Տարոն Մարգարյանի նախընտրական քարոզչությունը շտաբը դրական է գնահատել: Ապա անդրադառնալով ընտրություններին, մասնավորապես ահազանգերին ու հաղորդումներին, նշեց, որ նախորդ ընտրությունների համեմատ դրանք նշանակալի պակասել են:

«Եղել է 49 հաղորդում: Եթե մենք համեմատում ենք այդ բողոքները 2013թ.-ի ընտրությունների հետ, ապա պետք է նշենք, որ այդ հաղորդումները պակասել են»,- նշեց նա:

«Ընտրությունների նախնական արդյունքները շատ տպավորիչ են, գոհացնում են, բայց նաև կանխատեսելի են: Որովհետև մենք կանխատեսում էինք, որ մեր քաղաքապետի թեկնածուն ունի շատ բարձր վարկանիշ, թիմը շատ պրոֆեսիոնալ է, կուսակցությունը կոփված է ընտրական գործընթացներում և մենք ակնկալում էինք, մեր երևանցիների վստահության շուրջ 70%-ը»,- հայտարարեց Շարմազանովը:

Շարմազանովը նշեց, որ չնայած արդյունքների ոչ ամբողջական ամփոփմանը, կարելի է արձանագրել, որ Երևանի ավագանու ընտրությունները եղել են մրցակցային, ժողովրդավարական:

«Այս ընտրություններում նախնական տվյալներով համոզիչ հաջողություն է արձանագրում գործող քաղաքապետ Տարոն Մարգարյանի գլխավորությամբ ՀՀԿ թիմը»,- հայտարարեց Շարմազանովը:

ՀՀԿ Շտաբի պետը՝ օգտվելով առիթից շնորհակալություն հայտնց այս ընտրություններում ՀՀԿ-ին մրցակից քաղաքական ուժերին:

«Ուզում եմ շնորհակալություն հայտնել մեր երկու օպոնենտներին՝ և «Երկիր ծիրանիին» դեբյուտի հետ կապված, և «Ելք»-ին: Հուսով եմ որ ապագա ավագանին Տարոն Մարգարյանի գլխավորությամբ արդյունավետ կաշխատի հանուն Երևանի»,- նշեց նա և ամփոփելով խոսքը շնորհակալություն հայտնեց նաև լրագրողներին օպերատիվ աշխատելու համար: