Ձեր վստահելի աղբյուրը

Քաղաքապետի թեկնածու Նիկոլ Փաշինյանը ընտրատեղամաս էր եկել կնոջ ու երեխաների հետ: Քաղաքացիական իր պարտքը կատարեց Շենգավիթ վարչական շրջանի թիվ 133 մանկապարտեզում տեղակայված 8/16 ընտրատեղամասում:

Քվեարկությունից հետո լրագրողների հետ զրույցում  ասաց, «Ելք»-ի նախընտրական շտաբն ահազանգեր է ստացել:

«Ինչ նախորդ երեք օրերին բացահայտել ենք,  դրա շրջանակում  է: Ընտրակաշառքի համատարած բաժանման խնդիր ունենք, դա արդեն կայացած ու ապացուցված փաստ է»,-ասաց Փաշինյանը:

Նա նշեց, ընտրակաշառքի պրոցեսին մասնակցում են նաև քաղաքացիները, հույս հայտնեց, որ կհաղթահարեն «ընտրակաշառքային հուսահատությունը»:

Նա ասաց, իրենց ձեռքի տակ եղած նյութերն ուղարկել են դատախազություն, հետևողական են լինելու, որպեսզի դրանց ընթացք տրվի:

«Մեր վերին ատյանը հանրությունն է, ժողովուրդն է, որ պետք է այս դատին դատավոր կանգնի, նա պետք է ընտրի, ինչպիսի դատավոր է ընտրելու»,-ասաց նա:

Փաշինյանն ասաց՝ ակնկալում են, որ իրենք հաղթանակ են տանելու. «Ինձ համար ակնհայտ է, որ առանց ընտրակաշառքի Հանրապետական կուսակցությունը որևէ շանս չի կարող ունենալ ոչ միայն այս, այլև որևէ ընտրությունում: Բայց, այնուամենայնիվ, խորհրդարանական ընտրությունները ցույց տվեցին, որ ընտրակաշառքով կարողանում են մարդկանց ուղղորդել»: