Ձեր վստահելի աղբյուրը

«Սրանք ՏԻՄ ընտրություններ են ու ցածր մասնակցությունը կարող է լինել ևս մեկ հանգամանք փաստելու, որ ՏԻՄ ընտրությունները թեև իրենց ձևով քաղաքական են, այնուհանդերձ իրենց բովանդակությամբ քաղաքական չեն»,- լրագրողների հետ հանդիպմանը հայտարարեց  ՀՀԿ փոխնախագահ, ԱԺ պատգամավոր Արմեն Աշոտյանը:

Նրա խոսքով, ցածր մասնակցությունն այս ընտրությունների ապաքաղաքական լինելու կարևոր ապացույցներից մեկն է:

«Թեպետ մենք կուզենայինք, որ մասնակցությունը լիներ ավելի բարձր»,-ասաց նա:

Նրա խոսքով, երևանցին ընտրել է Երևանի զարգացման ծրագիրը, կոմունալ տնտեսության, կրթության, առողջապահության ոլորտների զարգացումն ու տարբեր խնդիրների լուծումը:

Հիշեցնենք, որ ժամը 17:00-ի դրությամբ մասնակցությունը կազմել է 34.52 տոկոս:

«Երևանցիների  քաղաքացիական կամքի վրա ոչ մեկ չի բռնացել: Եվ թեպետ մեկնաբանություններն այնպիսին են, որ ցածր մասնակցությունն ի վնաս իշխանությունների է, այնուհանդերձ փաստենք, որ ընտրությունների արդյունքների ամփոփումը ցույց կտա, որ թե այս արդյունքը ինչի հետևանք էր»,-ասաց նա՝ կարծիք հայտնելով, որ ՀՀԿ-ի մրցակից ուժերը չեն կարողացել հավատ ներշնչել, մոբիլիզացնել սեփական ընտրազանգվածը, գրավել երևանցիների սրտերը:

«Գուցե մի քիչ առաջ եմ անցնում, եթե արդյունքների հրապարակումից հետո իմ ասածը չհամապատասխանեց իրականությանը, կարող եք գիշերվա ցանկացած ժամին զանգել և ասել, որ ձեր ասածով չեղավ»,-ասաց նա: