Ձեր վստահելի աղբյուրը

«Երկիր ծիրանի» կուսակցության ներկայացուցիչ Զարուհի  Փոստանջյանը երեկ հայտարարություն է տարածել, թե 9/46  ընտրատեղամասում ծառայություն կատարող ոստիկանները  տեղաշարժել են Երևանի ավագանու ընտրությունների քվեաթերթիկների չհրկիզվող պահարանը:

Ոստիկանության հասարակայնության ու լրատվության վարչության պետ Աշոտ Ահարոյանը ֆեյսբուքյան իր էջում տեղեկացրել է.

«Ստուգմամբ պարզվել է, որ ոստիկանները տեղաշարժել են մեկ այլ՝ ընտրական գործընթացի հետ որևէ առնչություն չունեցող պահարան: Այս իրողությունը հաստատել է նաև ընտրությունների մասնակից «Ելք»  դաշինքի ներկայացուցիչը: Երևանի ավագանու ընտրություններում ներգրավված բոլոր  քաղաքական ուժերի, հասարակական և դիտորդական կազմակրպությունների, զանգվածային լրատվամիջոցների ներկայացուցիչներին կրկին կոչ ենք անում ձեռնպահ մնալ  անստույգ, առավել ևս շինծու տեղեկություններով հանրությանը  թյուրիմացության մեջ գցելու գործելակերպից»:



Ավելի վաղ «Երկիր ծիրանի» կուսակցության լրատվական ծառայությունը տարածել էր հաղորդագրություն, որտեղ ասված էր.

««Երկիր Ծիրանի» կուսակցությունը հետևում է ընտրատեղամասերում առկա իրավիճակին և արձանագրել է, որ 14.05.2017թ. 01:20 -ի դրությամբ կից ներկայացվող տեսանյութում արտացոլված ընտրատեղամասերում չհրկիզվող պահարանները բացակայում են տեսանելի վայրից` տեսախցիկների տեսադաշտից:

Մենք այս երևույթը դիտարկում ենք որպես ՀՀ ընտրական օրենքի խախտում և ունենք մտավախություն, որ հանցագործության հետքերը թաքցնելու համար սերվերների վրայից կհեռացվեն հանցակազմ պարունակող տեսագրությունները: Քանի որ նաև թիվ 4 ընտրատարածքի ընտրատեղամասերում շուրջ 30 րոպե ամբողջությամբ խափանված է եղել հեռարձակումը, իսկ 9/46 –ում արձանագրել ենք ոստիկանների կողմից չհրկիզվող պահարանի հետ կատարվող գործողություն` տեղափոխություն և պահարանի բացված դռներ»: