Ձեր վստահելի աղբյուրը

«Ոչ, չի ստվերի: Ընտրական գործընթացը երբևէ չպետք է դիտել որպես մինապատած դաշտ, և մեկ քայլ աջ կամ ձախ՝ անդառնալի կորուստ է լինում»,- լրագրողների հետ զրույցում ասաց ՀՀ Կենտրոնական ընտրական հանձնաժողովի նախագահ Տիգրան Մուկուչյանը՝ պատասխանելով հարցին, թե արդյո՞ք նախօրեին քաղաքապետի թեկնածու Զարուհու Փոստանջյանի հետ  ՀՀԿ շտաբում գրանցված միջադեպը կարող է ստվերել ողջ ընտրությունները:

Նա նշեց, ընտրական գործընթացում հաշված ժամերի ընթացքում իրավահարաբերության մեջ են մտնում հարյուր հազարավոր քաղաքացիներ. «Իհարկե, կարող են լինել միջադեպեր: Օրենքի տարրական պահանջն է, որ այդ միջադեպերը քննության առարկա հանդիսանան, դրանց վերաբերյալ իրավական գնահատականներ տրվեն: Բայց երբ խոսում ենք ընտրության ստվերման մասին, միանշանակ պետք է կապել ընտրությունների արդյունքի հետ: Իսկ այս պարագայում դատողություններ անելու համար պետք է դիտարկել այդ ամբողջի համադրությունը, կապը»:

Տ. Մուկուչյանը նաև ասաց, որ միջադեպը տեղի է ունեցել տեղամասային կենտրոնից դուրս:

«Այն, ինչ կատարվում էր տեղամասային կենտրոններում, կարելի էր հետևել ուղիղ հեռարձակման միջոցով ու ամեն մեկը դատողություն աներ իր համար: Հետևելով այդ ամենին՝ մեր դատողությունն այն է, որ ընտրական գործընթացն ընթացել է Ընտրական օրենսգրքի պահանջներին համապատասխան»,- հավելեց ԿԸՀ նախագահը:

Ինչ վերաբերում է Զարուհի Փոստանջյանի հետ կապված միջադեպին, Տ. Մուկուչյանն ասաց. «Ընտրությունների նախորդ գիշեր տարածեց հաղորդագրություն, որ ընտրատեղամասից տեղափոխում են չհրկիզվող պահարանը: Հնչեցին տարբեր կարծիքներ, դատողություններ: Տեղում կատարված ուսումնասիրությունների արդյունքում պարզ դարձավ, որ այդ չհրկիզվող պահարանը որևէ կապ չունի այն չհրկիզվող պահարանի հետ, որում պահվում էին ընտրական փաստաթղթերը: Ըստ էության, ներկայացվել էր ինչ-որ տեղեկություն ինչ-ինչ լսածի, ենթադրությունների, որոշակի սեփական դատողությունների վրա:

Դրանից հետո հերքվեց այդ ամբողջը: Լսեցի՞ք հերքման թեկուզ մեկ բառ: Իհարկե, ոչ:

Շարունակությունը եղավ երեկվա միջադեպը: Ընտրական շտաբները կուսակցությունների կողմից բացվում են, որպեսզի վերջիններս կարողանան դրանց  միջոցով կազմակերպել իրենց մասի  ընտրական իրավունքի իրականացումը: Այստեղ խնդիրը ոչ թե  վերաբերում է տարածքի անձեռնմխելի լինելուն, կամ չլինելուն, այլ նրան, որ  բացառապես ասեկոսեների, ենթադրությունների, անհասկանալի աղբյուրներից ստացված տեղեկությունների և այլնի հիմքով մուտք գործել և որևէ կուսակցության ընտրական շտաբում  պարալիզացնել վերջիններիս աշխատանքը, դա ուղղակի անընկալելի է»: