Ձեր վստահելի աղբյուրը

Երեք օրվա ընթացքում Կենտրոնական ընտրական հանձնաժողով ոչ մի գրավոր դիմում-բողոք չի ներկայացվել, ըստ երեկ գիշերվա տվյալների՝ ոչ էլ տարածքային ընտրական հանձնաժողովները: Երեկ կայացած Երևանի ավագանու ընտրությունների նախնական արդյունքներն ամփոփելուց հետո՝ լրագրողների հետ զրույցում ասաց ԿԸՀ նախագահ Տիգրան Մուկուչյանը՝ պատասխանելով հարցին, թե քվեարկության օրն ընտրակաշառքի բաժանման, ընտրախախտումների վերաբերյալ դիմումներ ստացե՞լ է ԿԸՀ-ն:

Նա նշեց, որ այսօրվանից սահմանված ժամկետով կարող են ներկայացվել դիմումներ, որոնք կարող են լինել վերահաշվարկի, քվեարկության արդյունքների անվավեր ճանաչման վերաբերյալ:

«Այս պահի դրությամբ նման դիմումներ չեն ստացվել»,- ասաց Տ. Մուկուչյանը՝ տեղեկացնելով, որ ստացվելու դեպքում Ընտրական օրենսգիրքը նախատեսում է ժամկետ, որի ընթացքում բոլոր դիմումները պետք է դառնան քննության առարկա: 

Դիմումների ներկայացման ժամկետն է՝ այսօր ժամը 12:00-18:00-ն, վաղը՝ 09:00-11:00-ն՝ տարածքային ընտրական հանձնաժողովներ: ԿԸՀ նախագահն ասաց, որ մեկ օր ավելի ժամկետ է նախատեսված այլ անձի փոխարեն քվեարկելու վերաբերյալ դիմումներ ներկայացնելու համար:

Նա նշեց, որ ընտրությունների արդյունքներն անվավեր ճանաչելու վերաբերյալ դիմում կարող է ներկայացվել ընտրություններին մասնակցող սուբյեկտի կողմից մինչև ուրբաթ օրը՝ մայիսի 19-ը, ներառյալ, ժամը 18:00-ն: Տ. Մուկուչյանն ասաց, որ այդ մեկ դիմումի համար անհամեմատ ավելի երկար ժամկետ է նախատեսված:

Ընտրությունների վերջնական արդյունքներն ամփոփվելու են  քվեարկության 7-րդ օրը:

Ինչ վերաբերում են քվեարկության օրվա ընթացքում ԿԸՀ ստացված ահազանգերին, Տ. Մուկուչյանն ասաց, որ դրանք եղել են տարբեր բնույթի՝ խորհրդատվություն ստանալու, խախտումների վերաբերյալ:

«Փորձել ենք բոլորը դարձնել ուսումնասիրման առարկա: Կամփոփենք, կներկայացնենք»,- հավելեց նա:

Տ. Մուկուչյանը նաև ընդգծեց, որ քանակական առումով այդ հաղորդումները, հրապարակումները աննախադեպ  քիչ էին:

«Բովանդակային առումով էլ եթե փորձենք գնահատական տալ երեք օրվա ստացած ահազանգերին, դրանք վերաբերում էին առանձին ինչ-ինչ դեպքերի: Արտառոց ահազանգ օրվա ընթացքում չի ստացվել»,- հայտարարեց ԿԸՀ նախագահ Տ. Մուկուչյանը: