Ձեր վստահելի աղբյուրը

«ԱԺ մշտական հանձնաժողովների կրճատման վերաբերյալ այս պահին հստակ բան ասել չեմ կարող»,-լրագրողների հետ զրույցում հայտարարեց ՀՀԿ խորհրդի անդամ Հրայր Թովմասյանը:

Նա նշեց, որ «ԱԺ կանոնակարգ» օրենքը սահմանում է, որ ԱԺ-ում առաջին նստաշրջանի ընթացքում  ԱԺ-ն պետք է հստակեցնի հանձնաժողովների ու նրանց անդամների թիվը, ոլորտները:

«Դա կկատարվի վաղը: Նախաձեռնությունները պատկանում են խմբակցություններին: Չորս խմբակցություններն էլ կարող են առաջարկություն ներկայացնել, որոքն կքննարկվեն»,-օրենսդրությունը ներկայացրեց ԱԺ աշխատակազմի ղեկավարը:

Նա ասաց, որ հարցի վերաբերյալ մեկ անգամ ներկայացրել է իր անձնական կարծիքը. «Չեմ ուզում կրկնվել, վաղը խմբակցությունում կքննարկվի ու որոշում կկայացվի: Կրճատման օգտին է  խոսում երկու գործոն՝ ԱԺ պատգամավորների թիվը կրճատվել է, էականորեն փոխվել են հանձնաժոովների գործառույթները, ինչը նշանակում է, որ ավելի մեծ ռեսուրս է պետք այդ աշխատանքները կատարելու համար»:

Վկայակոչելով վերլուծությունների արդյունքները՝ նորընտիր պատգամավորը նկատեց, որ մշտական հանձնաժողովների ծանրաբեռնվածությունը անհամամասնորեն է եղել: Տնտեսական ու պետաիրավական հարցերի մշտական հանձնաժողովները իրենց վրա կրել են աշխատանքների 50 տոկոսը, մնացած տասը՝ մյուս 50 տոկոսը:

«Սա հաշվի առնելով, որոշակի փոփոխություններ կլինեն»,-ասաց նա:

Նշենք, որ այսօր ՀՀԿ-ն բացի ԳՄ նիստից նաև խորհրդի նիստ է գումարելու: