Ձեր վստահելի աղբյուրը

Մայիսի 18-ին՝ Թանգարանների միջազգային օրվա կապակցությամբ Ռուսական արվեստի թանգարանը (պրոֆեսոր Արամ Աբրահամյանի հավաքածու) կազմակերպում է «Բույր, Պատկեր, Հիշողություն» ցուցահանդեսը։ Ռուսական արվեստի թանգարանից  Panorama.am-ին հայտնեցին, որ ցուցահանդեսը ներկայացնում է տարբեր երկրների և ժողովուրդների անցած դարաշրջանների օծանելիքները և նրանց սրվակները` որպես դեկորատիվ-կիրառական արվեստի ստեղծագործություններ:

«Սրվակները կարող են մեզ շատ բան պատմել: Դրանք (օծանելիքի սրվակները) ավելին են, քան պարզապես սրվակներ անուշաբույր նյութերի համար։ Սրվակները խոսում են ժամանակաշրջանի, մարդկանց մասին և կարող են դառնալ յուրահատուկ ուղեկցողներ դեպի պատմության գիրկը: Պետք է պարզապես ուշադիր լինել պիտակներին և դրանց վրա  պատկերված սիմվոլներին»,- նշում են թանգարանից:

Ցուցահանդեսն ընդգրկում է 19-րդ դարի վերջից մինչև 20-րդ դարի կեսերի ռուսական, ֆրանսիական, անգլիական, գերմանական, չեխական օծանելիքների սրվակներ, որոնք պատրաստվել են ժամանակի հայտնի գործարանների և դիզայներ-նկարիչների կողմից,  ինչպիսիք էին՝  Լյուդվիգ Մոզերը, Ռենել Լալիկը, Կազիմիր Մալևիչը և այլոք։  Ներկայացվում են նաև վերոհիշյալ երկրների օծանելիքներն՝ սկսած 20-րդ դարի 20-ական թթ. մինչև 20-րդ դարի 70-ական թթ.։ Ցուցադրության մեջ հատուկ տեղ  է  գրավում ռուսական օծանելիքի պատմությունը։

Ցուցադրությունն ամփոփվում է 20-րդ դ.  60 - 80-ական թթ. օծանելիքներով, որոնց բույրերն իրենց արտացոլումը կգտնեն մեր մայրիկների և տատիկների հոգում` արթնացնելով հաճույքի և բերկրանքի զգացողություններ և վերադարձնելով նրանց իրենց մանկության, առաջին ընկերության, առաջին սիրո հուշերի գիրկը: Հավաքածուն Ռուսական արվեստի թանգարանին տրամադրել է Սարգիս Ազարյանը: