Ձեր վստահելի աղբյուրը

Վստահեցնում եմ, որ աշխատանքային բոլոր քայլերս բխելու են մեր պետության և ժողովրդի շահերից»,- այս մասին այսօր ՀՀ Ազգային ժողովում հայտարարեց  ՀՀԿ-ից առաջադրված ԱԺ նախագահի թեկնածու Արա Բաբլոյանը:

«Շնորհակալ եմ ԱԺ նախագահի պաշտոնում իմ թեկնածությունն առաջադրելու համար: Իմ երախտագիտությունն եմ հայտնում ՀՀ նախագահին, ՀՀԿ-ի իմ գործընկերներին նման վստահության համար: Այդ վստահությունը ստիպում է ինձ մեր երկրի զարգացման անցումային այս փուլում լինել առավել պատասխանատու»,- ասաց Արա Բաբլոյանը:

Նրա խոսքերով՝ շատ լավ է գիտակցում և համոզված է, որ խորհրդարանական կառավարման անցնելու քաղաքական որոշման ու դրա իրագործման արդյունավետությունը պայմանավորված է լինելու ոչ միայն կառավարման համակարգի ճիշտ ընտրությամբ, այլև` յուրաքանչյուրիս պատասխանատվությամբ, տքնաջան ու հետևողական աշխատանքով:

«Հայաստանի Հանրապետության իշխանությունն, ինչպես գիտենք, պատկանում է ժողովրդին, որն էլ իր քվեով ձևավորեց այս Ազգային ժողովը: Հիմք ընդունելով այս պարզ ճշմարտությունը, պաշտոնավարմանս ընթացքում մշտապես ղեկավարվելու եմ  այն գիտակցությամբ, որ ես հանրության քվեով ձևավորված ԱԺ նախագահ եմ, ինչը բազմապատկում է պարտավորվածությանս աստիճանը: Վստահեցնում եմ, որ աշխատանքային բոլոր քայլերս բխելու են մեր պետության և ժողովրդի շահերից»,- նշեց Արա Բաբլոյանը: 

Ըստ նրա՝  այս ընտրությունները մնացած բոլոր ընտրություններից տարբերվել են բարձր կազմակերպվածությամբ, խախտումների հնարավոր նվազեցմամբ ու կեղծիքների բացակայությամբ: Իսկ այդ ամենին, Արա Բաբլոյանի խոսքերով, հնարավոր եղավ հասնել միասնական աշխատանքի արդյունքում՝ իշխանության և ընդդիմության քաղաքական բարձր կամքի դրսևորմամբ  և համատեղ աշխատանքով:

«Վստահեցնում եմ, որ անելու եմ հնարավորը, որպեսզի իշխանություն- ընդդիմություն  համագործակցությունն ամրապնդվի, որն էլ միտված է լինելու Հայաստանի զարգացմանն ու առաջընթացին»,- ասաց նա:

Մանրամասները՝ տեսանյութում: