Ձեր վստահելի աղբյուրը

«Ելք» դաշինքի խմբակցության անդամ Էդմոնք Մարուքյանն այսօր ԱԺ-ում Արտաքին հարաբերությունների մշտական հանձնաժողովի նախագահի պաշտոնում  ՀՀԿ խմբակցության կողմից առաջադրված Արմեն Աշոտյանին ասաց, որ ինքը Արտաքին հարաբերությունների հանձնաժողովի անդամ է եղել 5 տարի, և իր համար Աշոտյանի կերպարը, որպես հանձնաժողովի նախագահի, անհամատեղելի է:

Նա նշեց, որ նախ՝  Արմեն Աշոտյանը քաղաքական ընդդիմախոսների նկատմամբ հանդուրժողական վերաբերմունք չունի, բացի այդ, ՀՀԿ-ի արտաքին կապերի պատասխանատուն լինելը չի նշանակում, որ խորհրդարանի արտաքին հարաբերությունների հանձնաժողովը ՀՀԿ-ի արտաքին  արտաքին քաղաքականությունը վարող մարմին է:

«Այսինքն՝ այստեղ պետք է տարանջատում  ունենանք, քանի որ հանձնաժողովը ներկայացնում է խորհրդարանին, այլ ոչ թե կուսակցությանը: Ուզում եմ հասկանալ, թե ինչպե՞ս եք դուք պատկերացնում հանձնաժողովի աշխատանքները ձեր կեպարի ու իմ նշած համատեղելիության կոնտեքստում: Եթե ես ձեզ համեմատում եմ Արտակ Զաքարյանի հետ, բավականին լուրջ տարբերություններ կան: Ունենալով տարբեր քաղաքական հայացքներ՝ մեզ հաջողվել է շատ հանգիստ աշխատել, բայց արդյոք դա կհաջողվի ձեզ հետ: Ես խորը մտահոգություններ ու կասկածներ ունեմ, որ դուք կկարողանաք այդ հանձնաժողովը ղեկավարել»,- նշեց Էդմոն Մարուքյանը:

Մինչ հարցին կպատասխաներ, Արմեն Աշոտյանը նախ հարցրեց, թե արդյոք իր պատասխանից կախվա՞ծ է լինելու Մարուքյանի քվեարկությունը և ապա շարունակեց, որ երբ ինքը բժիշկ էր և 2005 թ-ին մտավ խորհրդարան, շատերն ասում էին՝ ինչ գործ ունի բժիշկը քաղաքականության հետ, այսօր տեսնում ենք, թե բժիշկներն ինչ բարձունքի են հասնում քաղաքականության մեջ: Աշոտյանը նկատի ուներ ԱԺ նախագահ Արա Բաբլոյանին:

«Երբ բժիշկ էի և 2009 թվականին դարձա կրթության և գիտության նախարար, ասում էին՝ բժիշկն ուր, ԿԳ նախարարն՝ ուր: Հիմա ինձ հիշում եք՝ որպես կրթության նախարար: Երբ որ նախարար էի ու մտա Ֆեյսբուք, ձեր գործընկերներից մեկն ասում էր՝ լրջանալ է պետք, պարոն Աշոտյան, ինչ գործ ունեք ֆեյսբուքներում, այսօր արդեն մի քանի ամիս է հացը ձեռիցս տարել է: Կարծում եմ, որ այս տրամաբանական շղթան կարելի է էլի շարունակել: Պատասխանս չի ենթադրում անհամեստություն, ոչ էլ ենթադրում է՝ քվեարկեք, մենք ամեն ինչ կանենք միասին: Պատասխանը բավականին անկեղծ է»,- նշեց Արմեն Աշոտյանը:

Նա շնորհակալություն հայտնեց Արտակ Զաքարյանի գործունեության վերաբերյալ դրական գնահատականի համար՝ ասելով, որ ինքը նույնպես բարձր կարծիքի է:

«Բայց երբեք ես չեմ համեմատել երկու տարբեր մարդկանց, օրինակ՝ պարոն Մարուքյան, ձեզ երբեք չեմ համեմատել Նիկոլ Փաշինայնի հետ, որպեսզի հասկանամ, թե ինչու նա դարձավ խմբակցության ղեկավար, իսկ դուք ՝ ոչ: Դա ձեր քաղաքական որոշումն է, իսկ մեր քաղաքական որոշումը եղել է ներկայացնել իմ համեստ  անձի թեկնածությունը»,- ասաց Արմեն Աշոտյանը: 

Նրա խոսքերով՝ խորհրդարանական դիվանագիտության մեջ կուսակցությունների դերը կարևոր է, քանի որ որտեղ էլ գնան, հանդիպում են եվրոպական տարբեր քաղաքական ընտանիքների: Ըստ Արմեն Աշոտյանի՝ որքան ավելի լավ է զարգացած կուսակցական քաղաքականությունն արտաքին  ոլորտում, այնքան այն ավելի օգտակար կլինի իր երկրի համար: