Ձեր վստահելի աղբյուրը

ԱԺ «Ծառուկյան» կուսակցությունների դաշինք խմբակցության կողմից գիտության, կրթության, մշակույթի, երիտասարդության, սպորտի հարցերի մշտական հանձնաժողովի նախագահի պաշտոնում առաջադրվել է Վարդան Բոստանջյանի թեկնածությունը, ով նաև դասավանդում է Երևանի պետական համալսարանի  տնտեսագիտության ֆակուլտետում:

Ազգային ժողովում ներկայացնելով, թե ինչպիսի աշխատանք է ծավալելու հանձնաժողովի նախագահ դառնալու դեպքում, նրան հարցով դիմեց «Ելք» խմբակցության անդամ Արամ Սարգսյանը. «Ես գիտեմ, որ դուք դասավանդում եք ԵՊՀ տնտեսագիտության ֆակուլտետում,  գիտեմ ուսանողության վերաբերմունքը ձեզ: Հանձնաժողովի նախագահ դառնալուց հետո շարունակելո՞ւ եք դասավանդել: Ճիշտ է,  «Ելք» դաշինքը քաղաքական որոշում է կայացնելու, թե ինչպես կքվեարկի, բայց ես նաև իմ համեստ ազդեցությունն ունեմ դաշինքում՝ այդ քվեարկության վրա ազդելու առումով: Եթե  շարունակելու եք դասավանդել, ապա շատ լավ է, իմ վերաբերմունքը դրական կլինի, դասավանդելը շատ կարևոր է, եթե ոչ, այդ դեպքում կարող է վերաբերմունք փոխեմ»:

Վարդան Բոստանջյանը նախ ասաց, որ դասավանդում է նաև Արամ Սարգսյանի աղջկան, ապա շարունակեց.  «37 տարի դասախոսում եմ: Հազար անգամ էլ պատգամավոր դառնամ, էլի գնալու եմ համալսարան»:

Նա նշեց, որ բոլոր պարագաներում մեկը մյուսին չի խանգարի, անպայման լինելու է համալսարանում, առավել ևս, որ օրենքով պատգամավորներին թույլատրվում  է գիտամանկավարժական գործունեություն ծավալել: