Ձեր վստահելի աղբյուրը

«Արցախի առաջնագիծ մեր այցերի ժամանակ նկատել ենք այն նշանակալի աշխատանքները, որոնք կատարվել են առաջնագծում՝ ինչպես ամրաշինական, այնպես էլ Զինված ուժերում տեխնիկական հագեցվածության բարելավման առումով»,- Ազգային ժողովի նիստում ասաց ԱԺ պաշտպանության և անվտանգության հարցերի մշտական հանձնաժողովի նախագահի պաշտոնում ՀՀԿ կողմից առաջադրված Կորյուն Նահապետյանը՝ պատասխանելով «Ելք» խմբակցության քարտուղար Գևորգ Գորգիսյանի հարցին, թե ապրիլյան պատերազմը ցույց տվեց, որ բանակում առկա են որոշակի խնդիրներ, ի՞նչ գործնական քայլեր եք մտադիր անել վերահսկողությունն ավելի ուժեղացնելու համար մինչև պատերազմական գործողությունները հնարավոր խնդիրները բացահայտելու, շտկման ուղղությամբ քայլեր ձեռնարկելու համար:

Կ. Նահապետյանն ընդգծեց, որ վերջին տարվա ընթացքում ռազմական բնագավառում լուրջ ծավալի աշխատանք է իրականացվել. «Կան որոշակի աշխատանքներ, որոնց մասին չեմ կարող բարձրաձայնել՝ հաշվի առնելով հարցի էությանը»:

Գ. Գորգիսյանի  հաջորդ հարցը վերաբերում էր ոստիկանության գործողություններին, մասնավորապես վերջին տարիներին եղան բազմաթիվ դեպքեր,  երբ խաղաղ ցուցարարների նկատմամբ կիրառվեց անհամաչափ ուժ, գործնականում ոչ մի ոստիկան չպատժվեց, ի՞նչ մեխանիզմներ եք պատրաստվում այս ուղղությամբ,  որպեսզի վերահսկողություն իրականացնելու նպատակով կարողանաք ինչ-որ ձևով ազդել այս գործընթացների վրա:

Կ. Նահապետյանն ասաց, որ ոստիկանության գործողությունների կապակցությամբ կարող են հնչել տարբեր գնահատականներ. «Որքանով  են օրինական, համաչափ, դրա համար կան նաև իրավական ընթացակարգեր: Կարծում եմ՝ առաջին հերթին  իրավաչափությունը գնահատելու համար պետք է օգտվել այդ իրավական ընթացակարգերից՝ ունենալով կոնկրետ իրավական պատասխաններ»:

«Ելք» խմբակցության պատգամավոր Սասուն Միքայելյանը հետաքրքրվեց, թե արդյո՞ք հնարավոր չէ շնորհալի, տաղանդավոր երիտասարդները ծառայեն համապատասխան զորամասում կամ վերցվեն պետության հովանավորության ներքո: 

«Այո, ուղղակի պետք է այդ հանգամանքները հատուկ քննարկման առարկա դառնան  և ճիշտ ընտրություն կատարվի համապատասխան ծառայության վայրի ընտրության ժամանակ: Համաձայն եմ այդ մոտեցման հետ, բայց դա չպետք է գերագնահատվի և ստացվի այնպես, որ մենք մեր երիտասարդներին, ուղղակի  տալով նման հնարավորություն, զրկենք զինվորական ծառայությունն պատշաճ իրականացնելուց»,- ասաց Կ. Նահապետյանը: