Ձեր վստահելի աղբյուրը

ՀՀ  քննչական կոմիտեի Տավուշի մարզային քննչական վարչության Դիլիջանի քննչական բաժնում ձեռնարկված մեծածավալ քննչական գործողությունների արդյունքում պարզվել են «Դիլիջան ազգային պարկ» պետական ոչ առևտրային կազմակերպության «Հաղարծին»  6-րդ պահաբաժնից ապօրինի հատված ծառերը և փայտանյութը անտառից ապօրինաբար դուրս բերելու դիմաց կաշառք ստանալու հանգամանքները:  Ձեռք բերված ապացույցների համակցությամբ՝ մեղադրանք է առաջադրվել 2 անձի` «Դիլիջան ազգային պարկ» ՊՈԱԿ-ի  հատուկ ջոկատի տեսուչին և նույն  ՊՈԱԿ-ի  «Հաղարծին» մասնաճյուղի ավագ անտառապահին: Այս մասին հայտնում են ՀՀ քննչական կոմիտեից:

Նախնական քննության տվյալներով՝ «Դիլիջան ազգային պարկ» ՊՈԱԿ-ի  հատուկ ջոկատի տեսուչը, լիազորված լինելով վերահսկել անտառապահների ամենօրյա աշխատանքը, կաշառք ստանալու նպատակով իր հովանավորչությունն է առաջարկել «Դիլիջան» համայնքի բնակիչներից մեկին՝ «Դիլիջան Ազգային Պարկ» ՊՈԱԿ-ի «Հաղարծին» տեղամասի 6-րդ պահաբաժնից հատված ծառեր դուրս բերելու համար:

Քննությամբ ձեռք բերված տվյալների համաձայն՝ տեսուչը և ավագ անտառապահը գործել են նախնական համաձայնությամբ և 2017 թվականի մարտի վերջերից մինչև ապրիլի սկզբները  Տավուշի մարզի Հաղարծին գյուղի բնակչից ստացել կաշառք՝ վերջինիս օգտին ակնհայտ ապօրինի գործողություն՝ «Դիլիջան ազգային պարկ» ՊՈԱԿ-ի «Հաղարծին» 6-րդ պահաբաժնից ապօրինի հատված ծառերի և փայտանյութի՝ անտառից ապօրինաբար դուրս բերումը թույլ տալու համար:

Բացի այդ, ապացույցներ են ձեռք բերվել, որ ապրիլի սկզբներին ավագ անտառապահը կաշառքի գումարից  որոշակի մաս տվել է նաև նշված պահաբաժնի անտառապահին՝ փայտանյութի ապօրինի տեղափոխումը չխոչընդոտելու համար:

Ձեռք բերված բավարար ապացույցների համակցությամբ՝ հատուկ ջոկատի տեսուչին մեղադրանք է առաջադրվել՝ ՀՀ քրեական օրենսգրքի 311-րդ հոդվածի 1-ին մասով, ավագ անտառապահին՝ ՀՀ քրեական օրենսգրքի 311-րդ հոդվածի 3-րդ մասի 2-րդ կետով: Նրանց նկատմամբ որպես խափանման միջոց է ընտրվել կալանավորումը։

Քրեական գործի նախաքննությունը շարունակվում է, ձեռնարկվում են անհրաժեշտ քննչական գործողություններ՝ դեպքի հանգամանքների բազմակողմանի, լրիվ և օբյեկտիվ քննությունն ապահովելու ուղղությամբ: