Ձեր վստահելի աղբյուրը

Մայիսի 23-ին Բրյուսելում կայացավ Հայաստան-Եվրոպական միություն համագործակցության խորհրդի 17-րդ նիստը:  Հայաստանի Հանրապետության պատվիրակությունը գլխավորում էր արտաքին քաղաքական գերատեսչության ղեկավար Էդվարդ Նալբանդյանը, իսկ Եվրոպական միության պատվիրակությունը՝ ԵՄ արտաքին գործերի և անվտանգության քաղաքականության բարձր ներկայացուցիչ, Եվրոպական հանձնաժողովի փոխնախագահ Ֆեդերիկա Մոգերինին:
Կողմերն անդրադարձ են կատարել Համագործակցության խորհրդի նախորդ նիստից հետո արձանագրված ձեռքբերումներին:

Հանգամանալից քննարկում է ծավալվել Հայաստան-Եվրոպական միություն օրակարգի հարցերի լայն շրջանակի շուրջ, այդ թվում՝ քաղաքական երկխոսություն, առևտրի և ոլորտային համագործակցություն, մարդու իրավունքներ, շարժունակություն, բարեփոխումների գործընթաց: Խորհրդի նիստին մտքեր փոխանակվեցին Հայաստան-Եվրոպական միություն գործընկերության 2017-2020թթ. առաջնահերթությունների շուրջ։

Նիստի արդյունքներով Հայաստանի արտաքին քաղաքական գերատեսչության ղեկավար Էդվարդ Նալբանդյանը և Ֆեդերիկա Մոգերինին հանդես են եկել մամուլի համար հայտարարություններով: Մասնավորապես իր ելույթում Մոգերնին նշել է.  «Ես կցանկանայի շնորհակալություն հայտնել Հայաստանի արտգործնախարար պարոն Նալբանդյանին՝ իմ ընկեր Էդվարդին, այսօրվա շատ արգասաբեր և դրական հանդիպման առթիվ: Հայաստան-ԵՄ Համագործակցության Խորհուրդը չափազանց դրական էր: Հայաստանը, ում անկախությունը, սուվերենությունն ու տարածքային ամբողջականությունը մենք պաշտպանում ենք, շատ կարևոր գործընկեր է ԵՄ-ի համար: Այսօր մենք քննարկում ունեցանք մեր համագործակցության հաջորդ քայլերի շուրջ, քանի որ մենք աշխատում ենք ԵՄ-ի և Հայաստանի միջև համապարփակ ու ընդլայնված գործընկերության մասին համաձայնագրի շուրջ, որը ստորագրվեց այս տարվա մարտին:

ԵՄ-ն ցանկանում է ընդլայնել և խորացնել համագործակցությունը Հայաստանի հետ: Մենք արդեն առաջին առևտրային գործընկերն ենք Հայաստանի համար, ամենախոշոր միջազգային դոնորն ու բարեփոխումների աջակիցը: Մենք պատրաստ ենք շարունակել աջակցությունը մի շարք հարցերում բարեփոխումներ անելու գործում, ինչպես օրինակ՝ տնտեսական զարգացման, բիզնես միջավայրի կայացման, արդարադատության, մարդու իրավունքների կոռուպցիայի դեմ պայքարի հարցերում: Սրանք կոնկրետ խնդիրներ են, որոնք անմիջականորեն առնչվում են Հայաստանի քաղաքացիների հետ:

Մենք նաև ակնկալում ենք Հայաստանի ակտիվ ու կառուցողական մասնակցությունը Արևելյան գործընկերության առաջիկա գագաթաժողովի նախապատրաստման գործում, որը մենք պլանավորում ենք իրականացնել այստեղ՝ Բրյուսելում, այս տարվա նոյեմբերին:
Մենք նաև քննարկեցինք Լեռնային Ղարաբաղի հակամարտության խաղաղ կարգավորման հիմնահարցը: Եվրոպական Միությունը հավատում է, որ ստատուս-քվոն անկայուն է, և որ հակամարտությունը շուտափույթ քաղաքական լուծում ստանալու կարիք ունի միջազգային իրավունքի սկզբունքներին համապատասխան: ԵՄ-ն շարունակում է ամբողջովին աջակցել ԵԱՀԿ Մինսկի խմբի համանախագահող երկրների գործադրած միջնորդական ջանքերին»։