Ձեր վստահելի աղբյուրը

ՀՀ կրթության ու գիտության նախարարի պաշտոնակատար Լևոն Մկրտչյանն այսօր կառավարության նիստից հետո լրագրողների հետ զրույցում ասաց, որ վարչապետի հանձնարարականը՝ կապված դպրոցների օպտիմալացման հետ, վերաբերում է քաղաքային դպրոցներին:

«Մենք ունենք մարող դպրոց, օրինակ՝ Կոնդի դպրոցը, որն ավանդույթ ունեցող դպրոց է, բայց մի քանի տասնյակ աշակերտ ունի: Այդ դպրոցի ճակատագիրն իրոք դժվար է պատկերացնել»,- ասաց Լևոն Մկրտչյանը:

Նրա խոսքերով՝ ծրագիրը գյուղական դպրոցների չի վերաբերում, բայց եթե հասնեն գյուղերին, ապա պետք է մի շարք սկզբունքներ դրվեն: «Եթե գյուղի դպրոցն ունի 7 աշակերտ, իսկ 1-2 կիլոմետր հեռավորությամբ կա մեկ այլ դպրոց, որտեղ սովորում է 60 աշակերտ, ապա այդ 7 աշակերտով դպրոցն իսկապես դժվար է պահել, քանի որ մենք չենք կարողանա նրանց  որակով ապահովել»,- նշեց նախարարի պաշտոնակատարը:

Նա համոզմամբ՝  եթե կա բնակավայր, ուրեմն այդ բնակավայրը պիտի ունենա պայմաններ, որի մեջ մտնում է նաև դպրոցը:

«Հիմա ինչպե՞ս անենք, որ այդ տեղում որակ ապահովենք, այ դա խնդիր է: Դրա համար զարկ ենք տալիս հեռակա կրթությանը, էլեկտրոնային կրթությանը, մենթոր դպրոցներին: Այդ երեխաները մեղավոր չեն, որ իրենք ծնվել են մի տեղ, որտեղ 8 աշակերտ կա: Իրենց համար պետք է նույն պայմաններն ապահովենք, ինչ մյուսներին»,- ասաց Լևոն Մկրտչյանը: