Ձեր վստահելի աղբյուրը

Երևանի Շենգավիթ վարչական շրջանի ընդհանուր իրավասության դատարանում այսօր մեկնարկեց Ժիրայր Սեֆիլյանի, Հրայր Թոփչյանի, Սասունիկ Կիրակոսյանի, Հովհաննես Պետրոսյանի, Գալուստ Գրիգորյանի, Ներսես Պողոսյանի, Գևորգ Սաֆարյանի գործով դատավարությունը: Դատարանում հսկողությունն ուժեղացված էր:  Դատական նիստն ընթացավ ապակեպատ դահլիճում:

Դատարանում հավաքվածները բացականչում էին՝ «Ազատություն», «Մահ ռեժիմին»։

Դատական նիստը տևեց մի քանի րոպե: Այն հետաձգվեց, քանի որ Սասունիկ Կիրակոսյանի պաշտանը ներկա չէր նիստին:

Դատավոր Տաթևիկ Գրիգորյանը հայտարարեց, որ այսուհետ նիստերը կկայանան շաբաթական երկու անգամ՝ երեքշաբթի և ուրբաթ օրերին:

Լրագրողների հետ զրույցում Ժիրայր Սեֆիլյանի փաստաբան Տիգրան Հայրապետյանը խոսելով իր պաշտպանյալին առաջադրված մեղադրանքի մասին, ասաց. «Բազմիցս կարդացել եմ այն, ինչի մեջ մեղադրում են Սեֆիլյանին: Որևէ հստակ մեղադրանք չկա: Մեզ համար այս պահին պարզ չէ՝ մեղադրում են, որ նա իբրև թե ցանկացել է շենք, շինություններ  զավթել, ասում են հեռուստաաշտարակը, մեղադրանքում կա հեռուստաաշտարակը, Նուբարաշենի մի քանի զորամասեր: Այսպես լղոզված: Բայց թե երբ է նա փորձել, ցանկացել զավթել դրա մասին ընդհանրապես  չկա: Ցուցմունքներ կան, որ պետք է 2015 թ. դեկտեմբերի 1-ին լիներ: Եթե դեկտեմբերի 1-ին պետք է լիներ, ապա յոթ ամիս հետո Ժիրայր Սեֆիլյանը չի արել դա»:

Նա նշեց, որ որևէ մեկի մոտ կասկած չկա, որ Ժ. Սեֆիլյանը քաղաքական գործիչ է: Առաջին մեղադրանքը, փաստաբանի խոսքով, զուտ քաղաքական մեղադրանք է՝ հանրահավաքներ, ցույցեր է կազմակերպել, փորձել է ընդդիմադիր քաղաքական գործունեություն իրականացնել, անօրինական հավաքներ կազմակերպել ապրիլի 24-ին:

«Չնայած այդ մեղադրանքը մեկ ամիս հետո փոխվեց, բայց երկրորդ մեղադրանքը կա՝ ապօրինի զենքի շրջանառություն: Երկու հոգի իրար հետ ապօրինի զենքի շրջանառություն են արել, ցուցմունք է տվել, որ Սեֆիլյանը կապ ունի այդ զենքերի հետ ու նա ձերբակալվել է: Վերջում էլ ծանր մեղադրանքը դրեցին, 235-րդ, 219-րդ հոդվածներով:  Արհեստականորեն ստեղծված,  առաջ եկած մեղադրանք է,  որը, մեր կարծիքով, որևէ քննադատության չի կարող դիմանալ»:

Ձեռք բերված փոխկապակցված ապացույցների բավարար համակցության հիման վրա զանգվածային անկարգություններ կազմակերպելու նախապատրաստության, կազմակերպված խմբի կողմից ապօրինի կերպով հրազեն, ռազմամթերք ձեռք բերելու, պահելու, փոխադրելու և շենքեր, շինություններ զավթելու նախապատրաստության համար Ժիրայր Սեֆիլյանին մեղադրանք է առաջադրվել ՀՀ քրեական օրենսգրքի 35-225-րդ հոդվածի 1-ին մասով, 235-րդ հոդվածի 3-րդ մասով, 35-219-րդ հոդվածի 3-րդ մասի 1-ին կետով, զանգվածային անկարգություններ կազմակերպելու նախապատրաստության համար Գևորգ Սաֆարյանին մեղադրանք է առաջադրվել ՀՀ քրեական օրենսգրքի 35-225-րդ հոդվածի 1-ին մասով, կազմակերպված խմբի կողմից ապօրինի կերպով հրազեն, ռազմամթերք ձեռք բերելու, պահելու, փոխադրելու համար Հրայր Թոփչյանին, Սասունիկ Կիրակոսյանին, Հովհաննես Պետրոսյանին, Գալուստ Գրիգորյանին և Ներսես Պողոսյանին մեղադրանքներ են ռաջադրվել ՀՀ քրեական օրենսգրքի 235-րդ հոդվածի 3-րդ մասով: